Gran Final di Play off HEINEKEN fast pitch di Aruba Softball Bond den categoria AA dedica na Minguel Tromp y Emelina “Mamai” Loopstok a inicia diaranson ultimo na veld di Kudawecha. E dos rivalnan hopi balanca e aña aki a topa otro den final. Den e prome wega Pizza Hut Monsters tabata ganando 3-1 te den bom di 6 inning momento cu Royal Power a rally cu 5 hit consecutivo contra habridor Richinell Matos bon pa 6 careda pa bolter e score y finalmente gana e prome partido di e serie di best out of 5. Un tremendo ambiente cu bastante publico na cu transmision en bibo di Bo Guia Deportivo cu nos amigo Amador Oduber a sa di trece hungada pa hungada den diferente hogar aki na Aruba. Royal Power 11 careda, 9 hit, 2 eror. Pizza Hut Monsters 5 careda, 8 hit, 5 eror. Kelvin Silvania a drenta releva Jair Thompson den di 3 inning ta resulta pitcher ganado. Kelvin ta wordo releva pa Jomark Flanegin den di 6 entrada. Richinell Matos ta resulta pitcher perdedo kende ta ricibi relevo di Michael Fingal den di 6 entrada. Miho bateadonan pa Royal Power tabata Edward Cannister 1-1, Jair Thompson 3-2 y Eldrick Dijkhoff di 4-2. Pa Pizza Hut Monsters a destaca na plato Derward Ruiz 2-2, Alfred Williams 3-2 y Jonathan Tromp 1-1. Den 15 minuut despues di prome wega a inicia e di dos partido esta Game 2 di e serie di best out of 5. Royal Power hibando bentaha di 5-3 drentando bom di 7 inning momento cu Jomark Flanegin ta permiti dos base por bola hincando su mes den problema y Pizza Hut Monsters cu a “refuse” pa entrega ta conecta 3 hit back to back encluyendo un triple den center right di propio lansador Richinell Matos kende asina alogra gana su propio wega lagando Royal Power den tereno 6-5 haciendo e serie final uno hopi interesante. Pizza Hut Monsters 6 careda, 9 hit, 1 eror. Royal Power 5 careda, 8 hit, 2 eror. Richinell Matos ta gana y Jomark Flanegin ta bay cas cu e derota. Miho bateadonan pa Pizza Hut Monsters a resulta Derward Ruiz di 4-4 kende riba un solo anochi incluyendo e prome wega a bay di 6-6 aparentemente un record, Jonathan Tromp ta bay di 2-1. Pa Royal Power a destaca na bate Gregorie Krosendijk di 3-2, Richard Flanegin di 2-1. Playoff final door di maltempo a wordo posponi y lo continua diaranson 5 di October cu e prome wega cuminsando pa 7:15pm y di dos wega riba schedule pa 9pm na veld di Kudawecha. Fanaticada yega tereno di Kudawecha diaranson awor bin mira e gran final di campeonato oficial di Aruba Softball Bond y bin apoya bo ekipo preferi.