Roy Angela celebrando e prome lustro di su bunita proyecto “Roy Angela Major League Baseball Best Prediction Award” diasabra awor 2 di December den un forma magistral. Hopi lo puntra kico e proyecto aki ta? Wel 5 aña pasa Roy Angela un persona cu un pasion grandi pa deporte entre otro Baseball a crea un proyecto unda tur cuidadano por participa. Kico bo mester haci? Prome cu e season di Major League Baseball inicia na cuminsamento di April cada aña bo mester paga un suma chikito di Afl,25 florin pa por participa. Bo mester yena un formulario pronosticando resultadonan final di e temporada. Entre otro bo mester pronostica Campeon di cada division pues den tur 3 division tanto Liga Nacional y Liga Americana pa un total di 6, bo mester pronostica 2 wildcard di cada Liga pa un total di 4 ekipo, MVP di campeonato di cada Liga pues 2 MVP, CY Young Award di cada Liga esta e miho pitcher di cada Liga y tambe “Rookie” of the Year di cada Liga. E participantenan cu tin e miho pronostico lo gana na final di aña un suma di Afl.500 cash mas un trofeo pues e Roy Angela Best Prediction Award, dinner for 2 y giftcertificate. E prome 3 añanan un tremendo pelotero den su tempo Eddy Banfield (q.e.p.d) a sa di gana e Award aki mientras e di 4 aña esta 2016 Giomark Alders a conkista e Award. Diasabra awor 2 di December Roy Angela lo ta entregando e premio na ganado di aña 2017 pero esaki lo bay den un ambiente unico y lo wordo divulga durante e celebracion. Esaki lo tuma luga na “Barcadera Arena” na Barcadera # 39 na cas di Silvio y Mayra Rasmijn Roga cuminsando di 9pm te cu 2am den un gran fiesta bailabel. Badu Band y Why Not Band lo bay ta presenta pa deleita e publico presente cu un tremendo ambiente. Entrada solamente Afl.15 florin. Carchi ta obtenibel na DOWCO Sta Cruz of por jama Roy Angela libremente na 7407050. Ban sostene e proyecto aki cual aña tras di aña ta creciendo. No laga nan contabo. Wak pa bo t’ey.