Diasabra ultimo dia 3 di december a tuma lugar pa di 17 aña consecutivo e exitoso Charity Golf Tournament organisa pa Rotary Club of Aruba. E aña aki un biaha mas e team dinamico di Rotary Club of Aruba a kibra tur record na unda a recauda e gran suma di Afl. 130.000,- Rotary ta sumamente contento cu e logro aki pa asina por sigui contribui na e comunidad di Aruba. Un total di 30 team a participa diasabra na e prestigioso golf course di Tierra del Sol.
E exito aki no tabata posibel sin e sosten continuo di nos “Planitum Sponsors”, Caribbean Mercantile Bank y Aruba Airport Authority. Sin laga afor, e tremendo team di Tierra del Sol, cu cada aña ta haci nan maximo esfuerso pa surpasa tur expectativa pa cu servicio y bon ambiente di torneo. Despues di e torneo a sigui e anochi cu un tremendo dinner y premiacion. E team ganado a resulta e team di Compra Ltd. cu tabata consisti di Steve Bowen, Giovanni Albers, Hans Holwerda y Jan Roelofs Valk. E team ganador a ricibi nan premio cortesia di Digicel. Na di dos luga a keda e team “Pasa Pret” cu ta consisti di Gregory Croeze, Shensly Tromp, Orlando Rasmijn y Peter Looye, a ricibi un premio cortesia di Boolchands. E team di DHL cu tabata consisti di Sidney Flanegin, Cadochi Kock, Randolph Arends y Glenn van Wijk a keda na di tres lugar cu un premio cortesia di AMC Unicon. Tambe tabata tin premio pa e “closest to pin” na diferente holes, Nigel Nedd (#3), Cisco Quant (#7), Otto van Dieren (#15) Y Jim Hayes (#17). A sigui cu premiacion di “longest drive” hende homber Edson Kelly y hende muhe Anjelica Rooi. E special “Hole-in-One” a bay pa Steve Lacle, na “hole” 13.
Ademas di esaki tabata tin rifa cu premionan masha atractivo, entre otro weekend stays, joyas, dinners, gift certificates y un television 49”. Tambe a tene un mini-auction, cu diferente pakete atractivo. Pa medio di esaki, e mesun participantenan a haya un oportunidad pa haci nan contribucion adicional.
Durante e premiacion Rotary Club of Aruba a hasi entrega tambe di cheque na e diferente fundacionnan. Sonrisa, YMCA y Fundacion Ban uni un Man pa nos Muchanan a ricibi un cheque di Afl.20.000,- cada un. Fundacion Hende Muhe den Dificultad y Stichting Sociaal Fonds Colegio Arubano a ricib un check di Afl. 5.000,- cada un. Tur representante di e fundacionan aki a keda masha contento y gradicido cu e bunita gesto aki. E resto di e fondo cu a wordo recauda lo wordo reparti den e dianan venidero.
Presidente Stanley Looman a keda super contento cu e fondo recauda e aña aki. Esaki ta danki na e gran trabao di e comite organisador. “Mi ta hopi orguyo di e team aki cu a precura pa un biaha mas surpasa e suma di aña pasa. Tambe mi ta gradicido na e companianan cu a yuda nos e aña aki atrobe”, Stanley ta sigui comenta. “Asina aki Rotary Club of Aruba ta sigui cu e bunita trabao di yuda esnan di mas nececidad den nos comunidad”.
A parte di e “Platinum Sponsors”, Rotary Club of Aruba kier a gradici e “Gold Sponsors” PMEC, NV Arubaanse Wegenbouw, S & L Contractor N.V. y Felipe Construction Company ; “Silver Sponsors” cualnan ta AFAS, Fast Delivery, Jet International, De Palm Tours, CHS Technical Services, General Air Services, Total Services y AHI Airport Hospitality Industry; y tambe e “Hole Sponsors”. Tambe na Ultimate Automobiles y Garage Cordia cu un biaha mas a patrosina e posibilidad di dos “Hole-in-One”. Un danki special ta bai na e patronisadornan riba e area di F&B, cu sin duda a contribui na un experiencia completo durante y despues di e evento: Divi Resorts, Compra Ltd., Romar Trading, Aruba Trading Company y Vinco Trading Co. Alaves nos kier a gradici Clinical Massage Spa cu a ofrece massage complementario pa e hungadonan por keda relaha durante e torneo.
Rotary Club of Aruba kier a gradici un y tur cu e aña aki un biaha mas a deposita nan confiansa den e torneo aki. Na tur miembro di e comite organisado di Rotary Golf y tur otro miembro di Rotary y Rotaract Club of Aruba cu di un of otro manera a duna nan sosten, contribuyendo na un evento exitoso. Nos ta spera di conta cu boso sosten atrobe na 2017.