DEN HAAG, Hulanda – Miembronan di Tweede Kamer Andre Bosman (VVD) y Ronald van Raak (SP) a manda un mocion conhunto riba e final di un debate basta largo caminda cu nan a pidi pa Gobierno Hulandes pa consulta Nacionnan Uni, hunto cu Aruba, Corsou y St. Maarten, pa yega na un “cumplimento definitivo riba e derecho di auto determinacion di tur pais den reino.”
Den e debate aki a toca e parti riba e refinerianan Isla na Corsou y Citgo na Aruba, cual tin cu bisa a crea basta conmocion den sala.
Segun e corant virtual The Daily Herald di St. Maarten, e responsabilidad di Reino tambe a bin den e debate relaciona cu e polucion extenso causa pa e refineria Isla na Corsou y e deal cu Aruba a cera cu Citgo Petroleum pa rehabri e refineria na San Nicolas.
Parlamentario Roelof van Laar di e partido di obrero PvdA, a remarca cu na Corsou, muchanan di scol ta cay flauw debi na e humanan toxico y cu e ciere di e scol en cuestion no tabata prepara pa e problema real. El a urgi e Minister oa bin na un solucion real a corto plazo. Minister Ronald Plasterk a bisa cu refineria Isla tin atencion di Gobierno di Corsou y cu e ayudo di expertonan Hulandes, un solucion ta wordo busca.
Parlamentario Alexander Pechtold di e partido Democratico D66, a critica e falta di accion di gobierno Hulandes pa tackle e polucion causa pa refineria Isla. “Si e turista Hulandes wordo afecta den nan hotel, nos tur lo grita cu esaki ta inaceptabel.”
Van Raak tabata hopi critico riba e acuerdo di Citgo cu Aruba. “Tur hende por mira cu esaki ta un mal deal cu lo crea debenan grandi. E promesanan di Venezuela ta mes swak cu manteca,” el a bisa. El a enfatisa cu Aruba ta carga full e responsabilidad financiero pa e acuerdo aki.
Fuente: The Daily Herald