Ron Martis ta presidente di e comision “Ban yuda famia Kelly”, kende a splica cu lo bay tin un evento pa recauda fondo dia 29 di October, esta diasabra awo na Centro di Bario Noord. Esaki ta for di 8’or di mainta pa 8’or di anochi. Tur hende ta bon bini. Full e comunidad di Aruba ta bon bin pa haci donacion cu kico cu ta. Si bin djis pa apoya cu presencia, esey tambe ta welcome. Ta bay tin dino jump. Ta bay tin entretenimento. Ban aporta, ban yuda famia Kelly pa renoba nan cas cu a kima den Februari. Un incendio a causa hopi daño y esaki ta di lamenta. Mirando cu tin mucha tambe bibando den e famia, ta haya cu nan mester di un ayudo. Ta pesey ta boga na pueblo di Aruba pa bin diasabra, 29 di October na Centro di Bario Noord. Ta bay tin muchanan boluntario cu ta bay cu un busonnan, pa recolecta placa cu hende lo por tin pa haci riba caya. Nan lo ta situa den diferente post. Esaki ta bay wordo anuncia pronto. Asina Aruba lo sa di duna nan donacion unda cu nan mira e muchanan aki. Nan ta bay ta reconocibel. Nan ta bay tin un tshirt bisti bisando “Ban Yuda famia Kelly” y for di leu por mira nan.
Bini uno bini tur na Centro di Bario Noord, dia 29 di October, for di 8’or di mainta pa 8’or di anochi.
Ta bay tin un programa pa construi e cas di nobo. Tin un calculacion di cuanto e ta bay costa, cual ta 35 mil florin. Tin e experticio tambe, pasobra ta un cas di cunucu y e cas aki ta construi den un manera diferente. No un manera moderno cu ta rekeri mas experticio y mas tempo pa haci e renobacion aki.
E resto di e donacion cu wordo recauda, fuera di pa drecha e cas, ta pa recupera loke nan a perde.
E suma planea pa recauda, segun expertonan a mira y a calcula, si e ta menos of mas, no lo sa ainda, pero en todo cas, ta haci e intento pa drecha e parti cu a kima. Mester remarca cu no ta full e cas a kima. Si full e cas a haya daño di huma, pero no ta full e cas a kima. A logra di controla e candela toch basta lihe y danki Dios na cuerpo di bombero cu a sa di controla e candela, segun Martis.