Durante rueda di prensa di Fraccion di MEP riba diaranson 3 di Januari, Lider di Fraccion di MEP, Sr. Rocco Tjon a elabora riba e tema di entrega di cartanan di retiro, cu a wordo efectua dia 29 di December. Ex Prome Minister di Aruba Sr. Mike Eman a dicidi di ataca miembronan di gabinete Wever-Croes y Director di DRH, acusandonan di ta culpabel di “kita pan for di mama y tata di famia”. Loke ta hopi facil di remarca, ta cu enbes di responsabilisa su mes pa e mal maneho den varios area, hopi evidente por ehempel den e crisis financiero cu Aruba a keda aden despues di Gabinete Eman II, ta e no ta argumenta e dicon no a percura pa sigui e procedura nan stipula segun ley pa loke ta trata duna contract of “benoeming” den e aparato di gobierno, sea departamento, ministerio of instituto.
Sr. Tjon ta sigui door di bisa cu enbes di culpa otro y ta partidista, tin cu djis compronde y conforma cu loke ta stipula den ley y e proceduranan cu semper a wordo uza den e casonan aki. E la trece dilanti cu den inicio di Gabinete Eman I den 2009, e mesun procedura a wordo uza, unda cu a termina contracto di varios persona y e ambtenaarnan cu tabata “ter beschikking” a wordo manda bek na e departamento di unda nan a wordo haci disponibel pa traha pa un ministerio. E ora loke nos ta mira aworaki ta un procedura cu a wordo uza durante varios gobierno den nan terminonan di gobernacion. Loke si ta peculiar, ta cu den 2009, hefe di departamento di Serlimar y KIA a wordo manda cas door di Sr. Eman, den un señal claro di persecucion politico.
Sr. Rocco Tjon a sigui door di splica kico ta e proceduranan corecto pa loke ta trata duna contract y benoeming haci durante unda e gobierno ta “demisionario”. A urgi prensa tambe pa informa nan mes bon tocante e tema aki tambe, pa asina evita duna informacion incorecto of conta storia ficticio traha door di e partido di AVP y informa pueblo di Aruba den un manera honesto y corecto. E ser humano ta central pa Gobierno Wever-Croes, pero esey no kiermen cu ta sigui laga personanan probecha di e actonan iresponsabel di e gobierno anterior.
Por ultimo, Sr. Tjon a trece dilanti un peticion cu e la haci na Prome Minister Wever-Croes, pa wak pa esunnan (kader personeel) cu ta cumpli cu e rekisitonan y a pasa un procedura di solicitud, a pesar cu gabinete saliente a actua contra procedura nan, por kisas toch haya e oportunidad di keda na trabou si e hefe di departamento ta haya esaki bon pa e departamento en cuestion. Pueblo mester tene den cuenta cu tin hopi diferente aspectonan cu mester wordo cumpli cu nan pa asina segun ley y procedura, por nombra un persona pa un posicion den un departamento. Fuera di e rekisito di experencia y estudio, e vacatura mester ta disponibel, mester tin un presupuesto pa e posicion y haya positieve advies di DRH. E no ta un secreto cu den varios departamento ta haci falta di hendenan capacita y studia cu por haci e trabou debidamente, enbes di djis wordo poni eynan door di “vriendjes politiek”. Hopi di nos “Young Professionals” ta prefera bay traha den sector priva of keda afo unda nan a studia, door cu no por haya trabou den gobierno pa motibo di maneho iresponsabel. E yega ora di sigui pa dilanti cu un politica madura, integro y honesto, unda cu ta trata tur persona igual, unda cada persona ta haya e mesun posibilidad di trabou. Sr. Tjon ta enfatisa cu tin cu respeta e departamento y institutonan, yudando nan haya hende cu en berdad ta capaz y por haci nan funcion. Asina ki so por sigui cu e desaroyo positivo di nos pais Aruba.