CIUDAD DEL ESTE, Paraguay – Decenas di delincuente a enfrenta forsanan policial, y a laga explota varios auto y a asalta un empresa na Ciudad del Este, Paraguay, autoridadnan a informa.
Segun Augusto Anibal Lima, di e hefatura policial di Ciudad del Este, entre 40 pa 50 delincuente a asalta un empresa yama Prosegur.
Ademas nan a laga explota varios vehiculo dilanti e sede policial di e zona pa detene e accionnan policial. Segun informenan oficial den e enfrentamento di e asaltantenan cu Polis, un oficial a fayece y otro dos a resulta herida. Ademas, un muhe cu tabata circula den e zona, a ricibi un tiro den su pia.
Un vivienda dilanti e local di placa, tambe a wordo violenta, pero e pareha di anciano cu ta biba eynan, a logra sconde.
Segun polis, durante e atraco, e asaltantenan a uza armanan di caliber halto y cu laser. Despues di e asalto, tabata tin persecucion policial den e cayanan di Ciudad del Este y e careteranan di e luga, pero e delincuentenan a logra huy. Cu explosivo, nan a kima varios auto uza den e robo.
Pa comete e robo, e delincuentenan a rementa e kluis di Prosegur y segun polis a informa, nan a logra haci’e bashi. Ainda no ta confirma e cantidad horta, pero prensa local ta papia di mas of menos un 30 miyon di dollar.
Ciudad del Este, ta na e frontera cu Argentina y Brasil.
Fuente: CNN en Español