STOCKHOLM, Suecia- Polis na Suecia a lansa un operativo grandi diaranson pa detencion di dos homber cu a huy den un boto, después di cu nan a horta parti di e joyanan di e famia real Sueco.
Dos corona y un globo crucífero cu a pertenece na e reynan Sueco di siglo XVII a wordo horta diamars for di e catedral di e localidad di Strängnäs, cerca di Stockholm.
Testigonan a señala cu dos homber a sali coriendo for di e catedral, cu tabata habri pa publico y a dirigi nan mes pa e riu Malaren, for di unda nan a huy den un boto y na velocidad halto.
For di e tempo ey no tin ni señal di e hombernan. Polis a señala cu ainda no a identifica e sospechosonan.
“Ta 1-0 na nan favor. Pero verdad ta cu e joyanan no por duna nan un valor monetario, ta patrimonio invaluable di interés nacional”, e vocero di polis Sueco Thomas Agnevik a bisa.
E joyanan di e corona ta dorna di oro, perla y tabata forma parti di e pertenencianan di rey Carlos IX. Un di e testigonan di e robo cu lo drenta enlace matrimonial pa otro siman, a bisa na medionan local, cu ta e a yama polis.
“Mi a ripara eynan mes cu nan tabata ladron pa e forma den cual nan tabata comporta nan mes. Nan a haci masha malo mes di horta articulonan for di un luga sagrado manera e catedra aki”, Tom Rowell a bisa.
Vocero di polis a adverti cu e joyanan di famia real cu a resta lo mester wordo exponi den un futuro den un caha di siguridad, y rondona di glas blinda.