Robert Candelaria (AVP) : Mester ahusta “ongevallen regeling” pa ambtenaarnan

0

Pa hopi aña ta existi un “ongevallen regeling” pa empleadonan publico, pero pa añanan no a traha riba esaki. Esaki ta pone cu e acuerdo ta anticua y ta rekeri revision y actualisacion. Parlamentario di Fraccion AVP, Robert Candelaria a manda un carta diamars 5 di Juni 2018 pa Gobierno di Aruba. Criminalidad ta birando mas violento, di cual aña pasa tabatin un caso lamentabel den cual un Polis a perde su bida eherciendo su trabou. Esaki ta cosnan cu Fraccion di AVP no kier pa ripiti nunca mas ni cu Polis ni cu niun otro ambtenaar.

E carta aki ta basa riba loke ex Minister Presidente Nel Oduber a saca na aña 2004. Den e carta aki Fraccion di AVP ta pidiendo un aumento, di cual e tempo aya si un ambtenaar trahando fayece ta haya 100 mil florin y si e keda invalido y no por traha mas e ta haya un suma maximo di 200 mil florin.

Aworaki e fraccion ta proponiendo den e carta pa Gobierno actualisa e compensacion, unda ta pidi pa aumenta esaki si un ambtenaar haciendo su trabou fayece su famia ta ricibi 200 mil florin. Pero si e no por traha mas, p’e ambtenaar ta haya e suma maximo di 400 mil florin.

E motibo ta cu Gobierno mester ta un bon dunado di trabou cu ta cuida su empleadonan. Fraccion di AVP ta bin riba e linea di kico e partido ta para p’e. Esaki ta pa yuda cuida esunnan cu no por yuda nan mes bon. E fraccion ta kere cu esaki ta un cos importante pa Gobierno ahusta esaki despues di 14 aña teniendo cuenta cu costo di bida a subi y tur cos a subi. Tur dia e trabou ta core un peliger y por mira con esaki ta aumentando.

Fraccion di AVP ta prefera pa accidentenan no sosode mas, pero den caso cu esaki ta asina mes, e victima mester tin mas atencion na su recuperacion y rehabilitacion y no den su status financiero. Den caso di fayecimento, e famia hopi bes ta keda atras confronta un bashi den cas, tanto fisico como den sosten financiero pa cubri gastonan regular. Tur esaki ta un peticion cu nan ta haci na Prome Minister, asina Parlamentario Candelaria a expresa. E maneho aki ta pa purba mehora nan calidad di bida.

E linea di detaye di maneho Gobierno mester tin e libertad pa por stipula den e ongevallen regeling. E Parlamentario ta indica cu a bin cu e suma maximo di 400 mil florin a base di e cifranan di companianan di seguro. A puntra den 2018 kico ta e sumanan cu lo ta “redelijk” pa un persona, mirando e experiencia cu nan tin di seguronan di bida, seguronan di “ongevallen” (accidente) cu hendenan no por traha mas door di a keda incapacita. Asina a yega na e suma aki di un maximo di 400 mil florin, pasobra por ta un hende por sigui traha pero no e trabou cu e tabata haci prome. Si e entrada ta menos, ta compensa p’e por yega na e nivel cu e tabata prome. E maneho aki no ta costa presupuesto di Gobierno nada, pasobra cu algo pasa so Gobierno lo paga. Pues no mester paga un prima di seguro mensual.

FIN

Comments

comments