Manera cu pronosticonan mes a indica y manera cu Facebook mes a papia, al igual cu e encuesta cu masnoticia.com a tene riba su website, Rise from the Dead di Rusty, compaña pa N’Fuzion, a resulta di ta e Roadjam 2017 pa Aruba su Carnaval. Apesar cu e no tabata e ganador durante Caiso & Soca Monarch Festival, e ritmo electrisante y tambe e mensahe cu Rusty ta trece dilanti, cu despues di asina tanto tempo cu e tin sin participa, finalmente “El a lanta for di Morto” y a sa di conkista e publico Carnavalesco cu e cancion pegahoso aki. Hasta esnan cu no sa scucha soca, a manera “fall in love” cu e cancion aki.
Rise from the Dead a coy un 54% di e votonan online riba Tsunami cu Blacky, cu tabata tin 46% di e votonan. Tin di bisa tambe cu e cancion Purge, tambe tabata uno basta toca, hunto cu e tema ganador di e festival, pero publico a papia y a scoge Rise from the Dead. Un palabra di pabien ta bay na Rusty, N’Fuzion y esnan cu ta tras di e composicion y e areglo di e cancion. Esaki sigur lo bay wordo zona duro duro durante e tres ultimo dianan aki pa loke ta Carnaval 63.