Diabierna awo dia 9 di Juni lo tuma luga e rifa di cas di Lions Club of Aruba. Sr. Randolf Vrolijk ta amplia.
Aruba Lions Club a cuminsa cu e campaña intensivo for di December, pa conscientisa e pueblo pa cumpra un rifa di cas di Lions, e di 59 rifa di cas di Aruba Lions Club. Sr. Randolf Vrolijk ta gradici e pueblo di Aruba, pa nan sosten door di cumpra e rifa.
E rifa aki ta como un donacion pa Aruba Lions Club por sigui duna cierto servicionan cu pa añanan largo nan ta brinda na e comunidad. Sr. Vrolijk kier a haci un yamada dramatico na e pueblo di Aruba y na tur establecimento, manera gasoline station pa cumpra rifa ainda.
A resta un paar di buki ainda, unda Aruba Lions Club ta pidi pa sigui cumpra rifa, pa uno pa ta den wega, na di dos luga, gana un cas y na di tres luga, pa yuda Aruba Lions cu un donacion chikito.
Na diferente punto strategico, e miembronan di Aruba Lions CLub ta bendiendo nan rifanan y asina aki ta purba di ta mas cerca di e comunidad posibel y tambe ariba Facebook por wak tur e luganan unda tin ticket ainda.
Ta pidi e comunidad pa warda e ticket bon y sin e ticket no por reclama e premio. Unabes cu bo cumpra e rifa, cu solamente 25 florin, pa cual pa 25 aña largo Aruba Lions Club ta mantene e mesun prijs, diabierna awo bo por ta e felis ganado di un cas.
E cas aki realmente ta un proyecto special. Ta prome biaha cu nan ta traha un cas net mei mei di Aruba, na Jan Flemming. E no ta dedica na niun hende en especial. E ta prome biaha cu nan ta na un otro distrito, nan ta bezig cu e cas. E cas a yega dak, pero e no ta full cla ainda. Den luna di Juli pa Augustus e cas lo ta full cla y e ora e ganado lo por bay biba aden tambe.
Di berdad, Lions Club a opta e biaha aki y den futuro bay den otro distritonan, pa asina complace e pueblo Arubano den tur sentido. Aruba Lions Club a yega di bay diferente luga, Jaburibari, Jucuri mes. Pero e biaha aki, practicamente bo ta na mita di Aruba, unda cu Lions Club a scoge Jan Flemming pa traha e cas y asina aki duna otro distrito tambe oportunidad pa experencia un trahamento di cas di Aruba Lions Club.
Por ultimo, Sr. Randolf Vrolijk, presidente di Aruba Lions Club ta haci un yamado dramatico na comunidad di Aruba, ya cu nan ta den e ultimo oranan di e rifa, cual lo tuma luga diabierna awo. Ta pidi pa, locual nan a resta na bukinan di rifa, pa por favor acudi cera miembronan di Lions Club, of wak riba Facebook pa sa unda ta mas cerca pa cumpra y asina Lions Club tin mas hopi bendi, y asina aki tambe e entradanan ey, por sigui brinda e cantidad y calidad di servicio cu semper Aruba Lions Club a sa di brinda na e comunidad Arubano.