Rietveld Aruba a cuminsa 
Studiantenan contento pa cuminsa cu e programa di arte visual y diseño

Diamars, dia 15 di januari ultimo a tuma lugar e prome dia di e Introducion di Rietveld Aruba. Den total 15 studiante a cuminsa cu nan programa preparatorio, caminda cu pa 5 luna largo nan ta bay haya les di diferente docente di Gerrit Rietveld Amsterdam y di docente/ artista di Aruba. Durante e periodo aki e studiantenan lo traha riba nan portfolio, riba e desaroyo di nan creatividad y nan abilidad pa traduci nan pensamento pa producto final. Asina aki nan ta prepara nan mes debidamente pa por drenta un academia di arte den futuro.
E prome siman tawata un siman di introduccion unda cu nan a haya chance di cera conoci cu otro y mustra nan obranan y tarea cu nan a haci di antemano. Di biaha nan a cera conoci cu e coordinador nobo di e academia na Aruba, esta Sr. Glen Goddijn. Sr. Goddijn, un diseñado insdustrial, a keda impreshona cu e obranan di e studiantenan y ta wak cu sigur tin potencial den nan. Den e prome siman a hiba e studiantenan wak un exposicion di fotografia na Westin Art Gallery y tambe nan a bay wak e edificio unda nan lo haya les pa e proximo 5 luna. Ya nan a haya e prome tarea pa traha y nan ta hopi entusiasma pa cuminsa.
Den e edificio renoba den Wilhelminastraat ta bay bin e Bachelor di Arte Visual y Diseño cual lo cuminsa na september 2013. E studiantenan cu caba cu e programa di Introducion na mei por aplica pa pasa e entrevista di admision y asina drenta e Bachelor, contal nan cumpli cu e rekisitonan. E prome tres añanan ta haci e estudio na Aruba, e ultimo aña studiantenan lo haci examen na Hulanda. Na e mes momento e studiantenan di Amsterdam cu ta den e aña di stage por bin haci esaki na Aruba.
Mas informacion tocante e Bachelor lo ser duna mas den futuro.