Diamars atardi a lansa un candidato nobo cu ta uni su mes riba e lista di partido Pueblo Orguyoso y Respeta (POR). Cu grupo grandi di amistad, famia y miembronan di POR a duna Richenella Croes – Wever un caluroso bon bini den e team E Forsa Nobo.
“Diferente colega y na diferente ocasion a reuni cu Richenella riba locual cu e ta para pe, un persona cu a studia “Political Science” cual awo e ta bay eherce. Richenella a eherce diferente funcion den Sector Priva te cu na e momentonan aki e ta labora na Directie Arbeid en Onderzoek (DAO). Sinembargo manera cu el a indica na diferente ocasion su interes ta pa un dia eherce locual el a studia pe. Den e ramo di politica no ta mucho biaha bo ta haya e oportunidad di reconoce y haya un persona cu a studia “political science” pa uni na un team. Sigur no un persona di e caliber y calidad di persona cu Richenella ta, kende mi a siña conoce hunto cu su casa. Na momento cu a combersa y a conoce e interesnan cu Richenella tin pa eherce locual cu el a studia y specialisa den dje, mi a haya sa di su interes pa traha pa pueblo y pa su comunidad,” lider di POR Otmar Oduber a trece pa dilanti.
Richenella ta un persona hopi dedica riba aspectonan considera ‘chikito’ normalmente den politica, pero sumamente importante den e calidad di bida di hende. Hopi biaha nos como ser humano ta pensa riba retonan ‘grandi’ cu tin den politica, sinembargo den e caso aki Richenella ta papia hopi riba e aspecto social di nos cultura. Aspectonan cu ta e base/fundeshi cu nos kier bay crea a traves di e plataforma aki cu a lanta cu e slogan E Forsa Nobo. Pa nos cu durante di e ultimo lunanan a combersa cu hopi candidato y diferente persona, nos a bisa na diferente ocasion cu nos ta un partido cu a cuminsa cu cosnan innovativo. Nos a presenta un “Plan di Accion” basa riba un ‘bottom-up’ approach, caminda cu a combersa cu mas di 70 diferente instancia rond Aruba. A inverti tempo den ‘focus groups’, recientemente tabatin resultado di encuesta di maestro y studiantenan. Sr. Oduber ta enfatisa cu ainda ta brinda comunidad di Aruba e oportunidad pa contribui na e “Plan di Accion” door di duna nan feedback riba [email protected] pa otro luna por presenta un programa cu ta ‘di pueblo y pa pueblo di Aruba’.
Richenella Croes – Wever:
“E interes den politica semper tabata tey desde cu mi tabata bayendo Colegio Arubano caba. Esaki bo por mira refleha claramente den locual cu mi a studia y a termina. Mayoria persona cu studia ciencia di politica ta gusta of prefera di tin un funcion na unda cu ta acesora y duna conseho ‘tras di cortina’. Sinembargo desde cu mi a wordo acerca pa partido POR mi a cuminsa consulta cu famianan y amistadnan anto mi a bin tuma e decision pa purba eherce locual cu mi a studia pe y haci e miho posibel pa brinda tur locual cu ami tin, pa Aruba.”
Nos generacion a perde e confiansa den politiconan ami kier ta e diferencia pa trece e confiansa bek y duna politica e confiansa cu e merece di tin. Cu structura, compasion y cu hopi amor pa Aruba nos sigur POR.