Parlamentario Richard Arends: Asociacion di banco ta confirma aumento di 6% riba transaccionnan
Gobierno no ta tuma recomendacionnan na serio
Fraccion di Partido AVP den Parlamento ta ricibiendo diferente feedback for di comunidad y esaki ta un confirmacion cu Gobierno a introduci un ley di medida, cual ta e ley di “crisisheffing” conoci como e “coalitieheffing”. A bin cu introduci e cambio aki sin ningun consulta, sin pidi conseho y sin ningun analisis riba efectonan macro economico y specialmente pa e sector financiero di Aruba. Esaki ta confirma door di e reaccion di e asociacion di banconan y di ATIA.
Parlamentario di AVP, mr. drs. Richard Arends, a indica cu Fraccion di AVP a adverti p’e efectonan inflatorio di aumento di tarifa di BBO y BAZV, pero tambe ampliacion di e base. E servicionan cu antes tabata exonera di BBO y BAZV, aworaki lo conoce un aumento di tarifa di 0% pa 6% y principalmente lo tin su repercusionnan p’e mundo financiero di Aruba. E actividadnan bancario ta consisti di diferente servicio, di diferente cobramento di gasto y “fee”, di cual tur esaki 1 pa 1 lo conoce un aumento di 6% pa asina por cumpli cu e impuesto cu Gobierno ta impone riba nan entrada.
Tur e servicionan aki ta constitui na e entradanan di e institutonan financiero y institutonan bancario. Esaki no ta conta solamente p’e banconan comercial, pero mester pensa riba FCCA, APFA y otro instancianan di credito cu ta duna hipoteca y e companianan di seguro. “Nan tur lo conoce un aumento drastico pa loke ta trata e transferencia y gastonan di nan servicio”, Parlamentario Arends a expresa. Esaki ta conta pa tur “fee” cu banco ta cobra manera ora di “swipe” bo carchi di ATM di un banco pa un otro banco, “credit card fee”, “late fee”, transaccion di transferencia internacional, specialmente den e sectornan top, startups di “young professionals”.
Na momento di tratamento di presupuesto Fraccion di AVP a trece e puntonan dilanti, pero un biaha mas Gobierno a silencia nan y no a tuma e recomendacionnan na serio. Tur ta refleha na e exoneracionnan cu tabata t’ey pa un motibo. Exoneracion tabata t’ey pa no aumenta e costo di haci negoshi mas ainda riba e actividadnan comercial cu ta tuma luga den nos economia. Gobierno a opta deliberadamente pa amplia e base aki. Gobierno no por pretende cu e gasto adicional aki ta bay a base di e margen di ganashi di empresanan aki. Aumento di BBO/BAZV lo afecta e competitividad di negoshinan, specialmente esunnan mediano y chikito. Hopi biaha nan no tin espacio pa pasa e gastonan adicional na nan consumidornan y asina lo keda afecta grandemente.
Fraccion di AVP ta vocifera e preocupacion- y comentarionan ricibi for di sector comercial y ciudadanonan. E ciudadanonan cu a acerca AVP ta considera e aumento y expansion di e base di impuesto lo tin repercusion hopi mas grandi cu Gobierno ta premira. Gobierno ta bisa cu esaki ta pa cumpli cu e proyectonan PPP, cual proyecto semper a forma parti di e cuadro financiero di Gabinete Mike Eman I y II. A bin ta paga pa nan caba y esaki ta den e gasto di e proyectonan PPP cu CFT mes a conseha pa e 1.5% di GDP cu mester aloca esaki pa PPP.
AVP a adverti Gobierno riba e repercusionnan aki durante tratamento di presupuesto. Gobierno a opta pa no duna oido ni contesta, pero ta creando un “perfect storm” pa nan mes! Un aumento di BBO y BAZV, un ampliacion di e base aki, aumento di prijsnan combustibel, aumento di Airport Tax, aumento di awa y coriente, aumento di gasolin, cobransa pa piki sushi, pa parkeer y asina por sigui menciona. Ta premira cu e lo tin consecuencia p’e crecemento economico. AVP ta premira cu na fin di aña e tasa di inflacion lo ta hopi halto, afectando poder di compra y tambe e competitivididad di negoshinan.