Ricardo Croes kende awor ta e Lider nobo di partido RED ta splica mas di su plannan como lider nobo.Ricardo Croes no ta un persona desconoci y eleccion pasa e tabata number dos riba lista di partido RED Democratico. E ta conoci como ILA y tambe e ta conoci como e persona cu a trece e topico di legalisacion di cannabis den publico na 2012, tanto riba television y tambe na radio. Ta un tema cu a causa basta controversia, tanto riba arena politico como den area social. Tambe den e mundo medico. Esaki a pone cu ora cu a bay eleccion cu e tema ey, den partido RED, cu no tabata disfrutando di un sosten masal den pueblo y cu tambe a añadi di registracion di parehanan di mesun sexo, no a logra e resultado cu tabata desea, pero tin cu bisa cu prome cu e resultado ey a drenta, ya Croes a menciona caba cu RED no ta bay logra, mirando cu e mentalidad tin cu desaroya ainda pa e temanan aki cu a trece.
Eleccion a pasa y Croes a haya 420 voto. El a bishita ningun cas, el a bay ningun caminda y 420 ta e simbolo anual di cannabis internacional. Dia 20 di April, rond mundo, hasta den paisnan cu e ta ilegal, Cannabis ta haya un reconocimento, cual awor aki ta hopi mas grandi cu 3 aña pasa. Durante e tres añanan aki a pasa varios cos. Entre otro na 2014, tin cu prepara algo otro pa 2017, el a bisa Rudy Lampe, pasobra e dos temanan ya menciona, contrincantenan politico, no ta bay laga RED cun’e. El a agrega cu no ta cumbini nan ningun laga e temanan aki un banda. E temanan aki ta mundial, nan ta berdad y e tempo mes ta bay set nan free y duna sosten den e pueblo pasobra ta para pa principio y berdad. Croes a splica cu tur hende sa caba cu di parti di MEP, sr. Glenbert Croes a bin dilanti y cuminsa papia di Cannabis Oil. Na e momentonan aki tin papia den pueblo cu sr. Otmar Oduber ta bay campaña y cu nan tambe lo bin cu e tema.
Na e momentonan aki ta papia den pueblo caba tambe cu tin un otro partido ta lantando bao di e liderasgo di sra. Marisol Lopez-Tromp, kende tambe ya a busca informacion caba pasobra nan tambe ta bin cu e tema.
Den un noticia cu el a lesa online cu a sali na St. Maarten, ta bisa cu otro luna Parlamento di Aruba lo trata e tema ey. No a mir’e den ningun noticia local y a compronde for di un persona cu ta referi na e reunion di Parlatino, pero no ta sigur. Ta duda cu e tema aki ta yega campaña otro aña sin cu Parlamento di Aruba mishi cun’e.