Playoff HEINEKEN fast pitch di Aruba Softball Bond dedica na Minguel Tromp y Emelina “Mamai” Loopstok a inicia diaranson ultimo riba veld di Kudawecha. Playoff di softball ta wordo hunga di acuerdo cu reglamento internacional esta e Page System Playoff. Piratas kende a clasifica number 1 den campeonato a enfrenta Celebreties den un serie di best out of 3. Piratas a inicia e wega riba un tremendo tempo cu bataso tras di bataso anotando no menos cu 6 careda den prome inning. Pitcher habrido di Celebrities Jean Carlo Kock no por a domina e bateria fuerte y ta wordo releva den prome inning pa Danny Yarzagaray kende ta logra drenta y paga e candela cerando e inning. Carl Yarzagaray a drenta skerpi y a mantene e wega hopi bon durante henter e partido teniendo su ekipo den wega. Poko poko Celebrities su bateria a cuminsa carga unda nan a conecta pitcher habridor Guillermo Montiel cu batasonan den tur skina di parke y ta logra empata e wega 9-9 den di 5 inning. Den bom di ultimo inning despues di un out Levis Gonzalez ta subi cu hit y ta bay segunda. Pitcher Danny Yarzagaray ta preta brasa pero e bateador experiencia Franny D’ Oleo ta conecta un cañonaso pa leftfield cual ta bira e “hit di oro” unda Levis Gonzalez ta pasa un pasa te home anotando asina e careda di victoria. Piratas a sina ta pica dilanti 1-0 den e serie di best out of 3. Guillermo Montiel ta bira pitcher ganador cubriendo henter e ruta regalando 3 base por bola y un hit by pitch. Danny Yarzagaray a luci tremendo riba monticulo desde prome inning cu el a drenta pero mester conforma su mes cu e derota. Piratas 10 careda, 13 hit, 1 error. Celebrities 9 careda, 12 hit, 2 eror. Miho bateadonan pa Piratas ta Jeremy Moreno 4-3, Jonathan Perez y Levis Gonzalez ambos di 4-2, Franny D’Oleo 3-2, Ramon Gonzalez 2-2, Luis Mendez di 2-1. Pa Celebrities a destaca na plato Jean Mark Tromp 4-3, Edson Den Boef 3-2, Albertico Webb y Greg Manuela di 1-1. Edson Den Boef a conecta un cuadrangular solido den deep center left. Weganan di playoff ta continua diabierna awor na Kudawecha y si e serie empata lo tin weganan desisivo di promer buelta diadomingo na Kudawecha. Play off HEINEKEN fast pitch a la carga.