PHILIPSBURG, Sint Maarten – Rey Willem-Alexander y minister Ronald Plasterk (Asuntonan interior y relacionnan di reino) durante dia di dialuna a yega Sint Maarten. Nan a baha na Prinses Juliana International Airport.
Nan ta bishita e isla, cu a wordo azota pa horcan Irma malamente.
Prome nan ta bishita e aeropuerto, cu ta crucial pa e brindamento di ayudo. Despues e rey y Plasterk ta haci nan recorido riba e isla, unda cu nan lo combersa cu voluntarionan, polis y militarnan.
E situacion di siguridad riba e isla ta fragil, prome minister Mark Rutte a bisa diadomingo ainda.
Despues, Rey lo bishita e hospital, Sint Maarten Medical Center. Despues di esey nan lo haya un briefing riba e situacion di e waf y suministro di awa. Tambe nan lo tin un encuentro riba e programa, cu gobernador Eugene Holiday, prome minister William Marlin y e minister di husticia di Sint Maarten.
Diamars nan lo bay e islanan di Saba y Sint Eustatius, cu tambe a wordo alcansa pa horcan Irma, segun e servicio di informacion di Reino.
Militarnan
For di Eindhoven a sali dialuna merdia un avion cu 204 voluntario y militar pa Corsou. For di eynan nan lo bula den avionnan mas chikito pa Sint Maarten. Tin mas of menos 100 Hulandes riba e isla, cu lo bay bek dialuna mes. Ta trata aki di turistanan y tambe habitantenan di e isla, cu ta haya alohamento door di famianan na Hulanda.
Cruz Cora lo tene un dia di accion nacional diabierna, pa asina recauda fondo pa e damnificadonan.
Fuente: www.nu.nl