Reunionnan di IPKO a termina diahuebs cu bishita na Hospital

0

E reunionan di IPKO cu a start diamars ultimo a keda conclui diahuebs. E ta prome IPKO di e Parlamento nobo di Aruba cu ta consisti den su mayoria di Parlamentarionan nobo. Miembro di Parlamento pa partido AVP Richard Arends a splica cu ta prome biaha cu e mes ta experencia un reunion di IPKO cu e ta califica como uno masha fructifero. Hasta lo institui un comision pa monitoria ehecucion di e 17 metanan di desaroyo sostenible. “Nos a hiba discusionnan hopi al caso. Riba problemanan, retonan, pero sigur tambe riba oportunidadnan cu e cuatro paisnan den Reino tin nan dilanti y hunto nos por uni forza pa asina soluciona e problemanan, enfrenta e retonan y gara e oportunidadnan.”
Arends “Nos a discuti riba energia, e metanan di desaroyo sostenibel y riba e oportunidadnan cu tin. Obviamente e situacion politico regional a hunga un rol importante e biaha aki y tabatin masha atencion di e Parlamentarionan Hulandes. Nan ta aki no solamente pa representa Hulanda, pero sigur tambe e islanan BES, den e caso aki Boneiro cu tambe ta wordo afecta door di e blokkade cu ta tumando luga awor akinan for di Venezuela. ”
E delegacion di e cuatro Parlamentonan a haci bishita na diferente instancia y proyectonan. Na hospital, den e parti renoba, nan a haya un recorido di e instalacionnan y un dia prome nan a bishita refineria di Aruba unda nan a haya un presentacion di e planta di algae.
Arends: “Mas cu tur cos ta cu nos a cera conoci cu otro, nos a reinforsa e relacionnan cu tin entre nos y nos a acorda e agenda pa e siguiente IPKO cu ta tuma lugar na luna di mei na Den Haag, Hulanda unda nos lo sigui profundisa y discuti riba temanan di interes comun. Mi por bisa cu tabata reunionnan hopi fructifero. Un opinion cu a wordo comparti door di e demas delegacionnan. Tabata un bon comienzo pa nos sigui intensifica y fortifica e relacionnan den Reino.”

LEAVE A REPLY

Please enter your comment!
Please enter your name here