Sra. Mervin Wyatt- Ras, Presidente di Parlamento ta splica ariba e biahe di reunion di IPKO na Hulanda.
E reunion di IPKO tabata uno hopi positivo unda ta reuni y ta intercambia di ideanan, entre e paisnan. Aki a trata topiconan hopi importante, manera esun di “geschillenregeling”, cu cada biaha ta bin dilanti durante e ultimo reunionnan, unda cu hunto cu Corsou y St. Maarten, hunto cu docentenan di Universidad di Aruba a traha un concepto di ley y presenta esaki. Y despues Minister Plasterk a bin presenta su mesun ley tocante e geschillenregeling. Esaki ta den tapara awo, el a bay Raad van State. Asina cu e ley aki yega Tweede Kamer, e paisnan lo haya oportunidad pa participa den Tweede Kamer y bin cu amienda si mester haci cambionan.
E areglo di disputa aki ta hopi importante, mirando tambe cu locual a yega di pasa ora cu gobernador no a firma e presupuesto di Pais Aruba, tabata un violacion di nos economia. Y na momento cu bo tin e sentimento eynan, bo por bay na un entidad independiente.
Tambe a trata e tema di hubentud, nos hobennan cu ta un topico cu cada biaha ta bin dilanti. Unda cu ta evalua kico a wordo logra den tur e tempo ey, y ta tene cuenta tambe cu e tempo cu a cuminsa trata e topico, cu e rapport di UNICEF, cu tin cu cumpli cu tur e rekisitonan pa loke ta tratadonan di Derechonan di Mucha. Recientemente a pasa e ley di Kinderopvang, unda muchanan hobennan por haya un acogida, den un forma cualitativo.
Tambe a trata enseñansa, cu ta un topico cu ta trata e AOV gat, unda cu e hobennan ta perde e pensioen cu nan ta bin na remarca p’e pa e añanan cu nan a keda den exterior, y esey ta jammer. No a logra yega na un conclusion cun’e ainda y lo sigui papia ariba dje.
Un otro topico ta e yudansa di DUO , y lo ta hopi bon pa e studiante aki bin na remarca si nan ta studia den region of na Merca, por ehempel. Actualmente esaki ta conta pa Hulanda so, y lo kier amplia esaki. Esaki ta un punto di discusion ainda cu Hulanda y otro paisnan.
Corsou a bin cu e punto di bista si nan por tin nan enseñansa tambe na Spaño y Ingles. Ya cu esakinan ta idiomanan cu e paisnan aki ta uza. Pero a keda concorda di lo bin cu un congreso pa asina tur bin hunto pa asina wak na unda tur lo kier yega.
Pa loke ta salud, e ta un topico cu a studia hopi durante e ultimo añanan den IPKO. pero desde 2011, ta tratando e topico aki, a palabra difernte puntonan y a logra tambe durante e healthconference di 2015 y esun di 2017, organisa door di Minister di Salud. A firma e protocol na 2015, pa malesanan di infeccion, cu ora cu tin un epidemia di esaki, lo por tin un cooperacion y Hulanda lo ta e focal point. Durante e ultimo Congreso a firma un MOU, tocante e cooperacion pa loke ta trata Inspectornan di Salubridad. Y esaki ta algo importante tambe, pa hisa e calidad tambe di cuido, cu ta un punto di discusion, tanto na Corsou, St. Maarten y Hulanda. Nos pashentnan a bira mas critico y ta exigi mas calidad. Si tin Inspector, e ta haci e trabao cualitativo. Si bo tin un team cu por ruleer y cu no ta solamente bo Inspector, pero di un otro pais ta vigila bo cuido di salud, esaki sigur lo haci cu e calidad lo bira mas halto. Falta ainda MOU pa asina bo por regla e cooperacion en general entre paisnan. Esaki no a wordo firma ainda, y ta spera cu pronto esaki lo por lus di dia, segun Sra. drs. Mervin Wyatt- Ras, Presidente di Parlamento.