Di diaranson 14 di Juni te cu diabierna 16 di juni e parlamentonan di Aruba, Corsou, Sint Maarten y Hulanda ta reuni na Den Haag, Hulanda.
Nan ta cuminsa diaranson dia 14 di Juni mainta cu un reunion plenario na Eerste Kamer presidi pa e miembro di Eerste Kamer, Ruard Ganzevoort.
Despues ta sigui den sesionnan den cual lo papia tocante e temanan di cambio di clima, sosteniblidad, hubentud y hobennan, enseñansa, oportunidad economico dentro di Reino, salubridad, discriminacion y integridad di gobernacion. Diaranson lo intercambia idea tambe tocante e situacion actual na Venezuela y e nificacion di esaki pa e region di Caribe y tambe e miembronan di delegacionnan lo pensa tocante ‘E Reino ideal den 2040’.
Riba diahuebs 15 di Juni tin entre otro riba e programa un reunion cu e miembronan di e Eilandsraadnan di Boneiro, Sint Eustatius y Saba. Diahuebs merdia lo tin algun bishita di trabou na Elemental Water Makers, e proyecto Nuon Solar y Stichting The Ocean Cleanup.
Ta cera e reunionnan interparlamentario diabierna cu e fihamento y firmamento di un lista di palabracion y tambe un conferencia di prensa cu e hefenan di e cuater delegacionnan.
E deliberacionnan entre e delegacionnan ta publico y por sigui esakinan bibo y directo pa medio di livestream, dependiendo unda esakinan ta tuma luga, riba e website di Eerste Kamer y di Tweede Kamer.
www.eerstekamer.nl
www.tweedekamer.nl
Link pa canal di YouTube di Tweede Kamer:
https://www.youtube.com/channel/UCEqXS8PoH57XaizXKMTL_UQ/feed