WILLEMSTAD – Durante su bishita na Corsou Colegio di supervision financiero di Corsou y Sint Maarten (Cft) a indica cu Gobierno nobo ta para dilanti di e reto di combina ekilibrio presupuestario cu e necesidad di fomenta crecemento economico. Pa varios aña caba Corsou ta cumpli cu e norma di un servicio ordinario ekilibra, pero te na e momentonan aki ehecucion den 2017 ta kedando atras di e pronostico. Gobierno nobo lo mester dal e pasonan necesario pa preveni un deficit presupuestario na 2017. E retonan ta sinta den e retrasonan den ingreso fiscal, mantenemento di ekilibrio di e fondonan social y fortalecemento di e administracion financiero. Banda di esey ta pidi extra atencion pa e riesgonan den proyecto specifico, manera e situacion financiero di InselAir. E speransa ta cu posibel inversion den e refineria y construccion di e di dos megapier por duna un impulso significativo na economia y, por lo tanto, na entrada di Gobierno. Ademas, por fomenta economia pa medio di mehoramento di e clima di inversion y mehoramento di e calidad di enseñansa.
Probablemente lo tin un presupuesto ekilibra na 2016
E gastonan di henter aña 2016 ta resulta mas halto, mientras cu precisamente e entradanan ta keda atras di e pronostico cu a inserta den e di cuater reportahe di ehecucion di 2016. Esey a sali na cla den e prome reportahe di ehecucion di 2017. E ultimo cifranan aki di 2016 ta mustra un deficit preliminar di ANG 30,8 miyon (0,5% di PIB). Sinembargo, Corsou ta spera ainda entrada di dividendo procedente di e empresanan publico, loke ta haci cu toch por cera aña presupuestario 2016 na un forma ekilibra. Cft a enfatisa importancia di un maneho di dividendo structural pa e empresanan publico, cu ta tene cuenta cu e posicion financiero di e empresanan y cu ta laga suficiente espacio pa inversion necesario, y ta adverti pa un maneho cu ta stens riba entrada incidental pa logra un presupuesto ekilibra.
Ehecucion di presupuesto di 2017 ta bou di presion
E saldo di gasto y entrada di e prome kwartaal ta cay ANG 41,3 miyon mas abou di loke a spera. E entradanan, particularmente di impuesto riba salario, ta decepcionante y tambe e entradanan di prima di Banco di Seguro Social (SVB) ta mas abou di loke a pronostica. E fondo fluctuante cu ta uza pa absorba e contratemponan di e fondonan social ta menasa di cay bou di e minimo legal. E gastonan publico ta en realidad mas halto cu loke a inclui den e pronostico. Presidente di Cft: “Gobierno nobo mester dal e pasonan necesario pa evita un deficit inminente na fin di 2017.” Ademas Cft ta conseha Gobierno nobo pa controla activamente transicion pa HNO y pa implementa un estudio di factibilidad (businesscase) renoba, basa riba e rapport di evaluacion. Ademas, den e presupuesto mester tene cuenta cu un situacion den cual InselAir no por paga bek e prestamo cu a dun’e. Por ultimo Cft ta mustra riba e posicion di likides y e capacidad di resistencia, mester reforsa tur dos.
Sigui cu mehoramento di administracion financiero
Fortalecemento di administracion financiero ta keda un reto importante. E obhetivo di obtene den un futuro cercano un declaracion aprobatorio di accountant ta ambicioso y lo rekeri hopi atencion administrativo. Cft ta duna bonbini na e proposito di gobierno di fortifica e funcionnan financiero denter di e ministerionan cu controlado financiero y accountant interno. Cft ta pidi Gobierno pa percura pa e fortificacion implementa den Servicio di Impuesto no stanca. Ademas Cft ta urgi pa aproba pronto e cuentanan anual di 2014 y 2015 y pa optimalisa e proceso di dunamento di cuenta y rason completamente.
Ultimo bishita di e presidente actual
Ademas di den cuadro di deliberacion tocante e resultadonan di e prome kwartaal, e bishita aki tabata tambe den cuadro di despedida di e presidente actual Age Bakker dia 1e. di Juli 2017 y di ceramento di conoci cu e proximo presidente Raymond Gradus. E presidente saliente ta wak atras na e exitoso colaboracion cu Corsou. Age Bakker tocante su periodo na Cft: “Corsou a dal den e ultimo añanan bon stap den direccion di realisacion di finansas publico duradero y sostenibel y cu esey el a cumpli grandemente cu e normanan legal. Mi ta contento cu gobierno nobo a anuncia di lo sigui duna prioridad na finansa publico duradero y sostenibel. Cft lo vigila esey.” Manera di custumber durante e bishitanan di Colegio na Corsou, a tene combersacion cu Gobernador, Ministro di Finansas, Conseho di Ministro y e Comision Financiero di Parlamento.