Ronella Croes di ATA ta splica tocante e crecemento di bishitante na Aruba den e prome mita di e aña aki y e locual ta spera p’e otro mita. Pero retonan den turismo ta keda halto.
Segun sra. Croes, Aruba a conoce un crecemento di bishitante cu mas o menos 2.7 porciento den e prome mita di aña. Aunke Venezuela a sigui cay, e otro mercadonan ta compensa esey. E manera pa compensa e caida di Venezuela ta por medio di mercado di Merca. Merca a crece cu 8 porciento den e prome mita di e aña aki. E otro mercadonan cu tambe ta bay bon ta Canada, Argentina, etc. Total por mira cu Aruba ta den un cifra positivo pa loke ta trata cantidad di bishitante. Pa loke ta trata calidad, tin diferente indicadornan. Locual cu tin ta loke AHATA ta raporta p’e prome seis luna di e aña aki cu ta un crecemento di entrada pa camber disponibel di riba 12 porciento compara cu e mesun temporada e aña anterior. Esaki ta riba e proyeccionnan stipula di 5 porciento, cual ta uno hopi fuerte. E aña anterior mes, e mesun indicador a cera e aña cu riba 10 porciento di crecemento. Esaki ta indica cu tin grado di ocupacion halto na hotelnan y tin bishitantenan dispuesto pa paga prijsnan mas halto. ATA ta proyecta cu esaki lo continua tambe y lo keda stabiel. No ta sperando un crecemento hopi halto, pero ta spera cu Merca y otro regionnan sigui ta fuerte. Tambe ta proyecta cu Venezuela lo sigui cay. Aunke kisas un tiki menos, e mercado di Venezuela ta uno cu hopi dificultad. Parti di e strategia ta pa enfoca riba Venezolanonan cu ta biba pafo di Venezuela.
Actualmente, ATA ta enfocando hopi riba temporada halto na caminda pa fin di aña y comienso di aña nobo por ta uno fuerte. Ta monitoreando di cerca e cantidad di cambernan cu a cay afo den e region Caribense pa via di horcannan cu a asota diferente destinacionnan aña pasa. Por bisa cu a haya 50 porciento di e cambernan ey bek, renoba, productonan relativamente nobo y bon prijs p’asina atrae bishitante. E situacion lo stabilisa den e region Caribense, cual ta significa cu competencia tambe lo crece. Esaki lo continua, pasobra e producto hotelero den Caribe lo sigui expande. Esaki ta cosnan cu ATA tin riba bista y mester ta cla pa cambia pa otro mercadonan ora e competencia bira mas fuerte den e mercado Mericano tambe. Esaki ta cosnan cu ATA ta trahando riba dje, entre otro riba coneccionnan aereo nobo cu pronto ta spera di por anuncia, sra. Croes ta conclui.