Departamento di Enseñansa di Aruba (DEA) a logra saca nan jaarverslag 2015- 2016. E motibo pa cual nan a cay atras ta cu nan a haya un sistema computarisa nobo y door di esey nan a cay atras. Pero esey no ta haci cu nan no tin informacion actualisa. Si un persona of un instancia mester di informacion, DEA tin informacion di 2017-2018 cu ya caba ta accesibel. Sra. Miriam Thiel di Departamento di Enseñansa ta splica.
Ariba DEA su website por haya tur informacion di e datonan di enseñansa, unda cu por haya e jaarverslag di Seccion di Investigacion y Estadistica di Departamento di Enseñansa Aruba, for di aña 1985-1986 te cu 2015-2016. Tambe tin Algemeen Financieel Deelname Resultaten di Enseñansa riba e website. Manera a bisa anteriormente, a caba di saca e jaarverslag 2015-2016, pero esun di 2016-2017 ya caba nan a traha ariba dje. Esaki ta bou di controle y lo haci tur lo posibel pa saca esaki ainda pe aña aki ainda, pa asina duna un bista general.
Loke ta resalta te ainda cu enseñansa no a crece drastico. Aki aya tin scolnan cu tin mas of menos mucha, pero e cifra general no a subi of baha drasticamente. Loke hopi hende semper ta remarca, ta esunnan cu ta keda sinta. Mayoria biaha den e jaarverslag, esunnan cu ta keda sinta den eerste klas di basis ta un tiki mas halto den klasnan. Esey ta door di estadistica internacional ta mustra cu e mucha ta bay mucho trempan pa bay eerste klas. Cu mucho trempan nan kiermen, cu e mucha kier hunga ainda, no ta cla ainda pa sinta keto y haci les den klas. Ariba esaki, Sra. Thiel a bisa cu DEA lo mester bay haci un estudio pa asina wak si e estadistica lo ta conta cu pa muchanan di Aruba tambe. Aworaki ta temporada di examen, den tweede tijdvak, cual ta e di dos periodo. Pa locual ta cifranan, no tin indicacion cu e cifranan a baha mucho.
Tumando e resultadonan di MAVO, no por bisa cu tin mucho cambio. Na EPB, den tweede tijdvak e mayoria biaha e cifranan ta subi.
Awendia e muchanan tin tur e tecnologia na man, pero toch e estudio no ta bay dilanti ya cu e porcentahe di muchanan cu ta bay over no ta subi, e ta keda rond di 60 cu 70%, pa cual Sra. Thiel a bisa esaki tin hopi factor cu ta hunga un rol. Pero tambe e motivacion di e mucha pa cu siñamento. Awendia e muchanan tin’e hopi mas facil, compara cu antes. Antes bo mester a busca mas pa bo haya bo informacionnan, bo ta hopi mas dedica y awendia e tecnologia ta haci’e mucho mas facil, pa cual e dedicacion no t’ey. Tambe e ambiente na scol por hunga un rol, kisas e mucha no ta sinti’e comodo na scol. Tin hopi factor, pero esakinan no a wordo investiga ainda.
Pero tambe, hopi biaha pa un rason cu no ta comprendibel, e cifranan ta keda mesun cos. Un rato e cifranan ta hopi halto y otro biaha nan ta baha drasticamente. No ta tur biaha e tin un rason mara na dje, Sra. Thiel a sigui bisa.
Mirando e relato cu DEA ta sacando, haciendo estudionan, Sra. Thiel a bisa cu a base di e website ta wak e evaluacion en total di esakinan, por duna un bista di e trend. Y a base di esaki nan ta bay profundisa nan mes, con pa sigui cu e resultadonan.