Resumen di control di Flex Team

0

Cuerpo Policial su Flex-Team durante di e siman di dia 7 pa 13 di mei a sigui cu su controlnan regular riba vehiculo como tambe den barionan y cayanan specifico unda cu e rol preventivo di e team aki un biaha mas a resalta.
Flex-Team a patruya den areanan cu tin retonan cu aglomeracion di persona manera Manuelito’s. Circle-K, Hotel Baccarat, e casnan di pueblo di Noord, Madiki, Sero Patrishi y Eagle Beach. Na Eagle Beach ta semper controla adicionalmente pa cu tocamento di musica demasiado duro. E parkeerplaats di The Village tambe ta wordo controla pa check pa hobennan cu ta para bebe for di auto, si polis tin cualkier sospecho cu tin algo ilegal tumando luga nan ta listra nan y/of nan auto.
Negoshinan manera Lekker, De Olde Molen y Cas Casuela ta wordo controla pa percura pa nan mantene na e orarionan stipula den ley, y cu nan ta cera na tempo y pa no keda clientenan aglomera of para den e parkeerplaats.
E team ta patruya den Arendsstraat, Canaostraat y Korvetstraat en conexion cu menasa y e tiroteonan cu a tuma luga recientemente, esaki ta inclui e area di Budweisterbar, Bar a Bar y den otro partinan den Madiki.
Como Budweiserbar y Bar a Bar ta conoci como sitionan unda cu hobennan ta para dilanti pa bende droga, semper polis ta core extra patruya.
Detencion di 3 sospechoso relaciona cu violacion di ley di LTU
Dia 12 di mei 2018, pa mas o menos 11 or y 30 di anochi, polisnan ta para un Nissan Platina na altura di South Beach Mall, pa un control. E auto en cuestion tabata tin ambos plachi di number blikia. E chauffeur J.M.A.H., naci na Venezuela, a declara cu e ta ilegal ariba e isla. E pasaheronan S.B.V. naci na Venezuela y G.C. naci na Republica Dominicana, a wordo transporta pa warda di polis na Shaba y traspasa pa e personal di I.A.S.A
Na warda, a bin haya un payslip di un restaurant den B. Su passpoort.
Personal di IASA bin Shaba y a bay cu e stranheronan aki, pa mas investigacion. E auto a wordo para den parkeerplaats di Shaba sperando pa su doño bin busk’e.
Detencion di tres sospechoso pa violacion di L.V.M.
Diasabra 12 di mei 2018, pa mas o menos 12 or y 20, polisnan riba parkeerplaats di “The Village” J.E. Irausquin Boulevard. Riba e parkeerplaats aki, unda cu nan a nota un auto di pasahero, marca Mitsubishi Lancer, color shinishi cu tres persona aden. Mientras cu nos a pasa eybanda, a haya holo di marihuana. Na e momento ey, a dicidi di haci un control. Yegando cerca e holor di marihuana, a bira mas fuerte. Ora cu nan a wak e polisnan, e pasahero a duna e persona sinta patras un cigaria. Polis a duna ordo na e pasahero pa duna nan e cigaria. E pasahero a duna su nomber, M.L. naci na Venezuela y kedando temporalmente na un appartment na Noord. Ora e dama aki a baha for di auto, polisnan a ripara cu tabata tin un sakito cu algo parecido na marihuana. E chauffeur a duna su nomber, C.D.E. naci na Venezuela y tambe kedando temporalmente na un appartment na Noord. E tambe a wordo pidi pa baha di auto. Den un tas preto a bin haya mas mata parecido na marihuana, a bin haya algun biyete di dollar Mericano di diferente nominacion. E tas cu e contenido a wordo tuma den beslag pa mas investigacion.
Sospechosonan deteni:
Door di esaki a detene M.L. y C.D.E. pa a viola articulo 4 di e Landsverordening Verdovende Middelen, na e sitio mes.
Traspaso di e monto na personal di Integraal Afpak Team Aruba
Durante e investigacion e sospechosonan no por a duna un hustificacion di e procedencia di e monto di placa. Door di esaki a tuma e monto den beslag. Esaki relaciona cu articulo 2:404. Esaki a wordo pasa pa Integraal Afpak Team Aruba pa mas investigacion.

Detencion 3 sospechoso pa violacion di ley di LVM
Diadoming, 13 di mei, pa mas o menos mei anochi, na altura di Eagle Beach, polisnan ta nota un Toyota Altezza para den e parkeerplaats. Ta trata di un auto cu stuurwiel na banda drechi. Na e momento nan ey no tabata tin niun auto den bicinidario. Mientras polisnan tabata pasando, nan a haya un holor di marihuana. Durante control a bin haya un mashin di mula marihuana y un asbak cu mita cabo di sigaria di marihuana.
Detencion sospechosonan:
Relaciona cu esaki a detene M, naci na Aruba, L. Naci na Hulanda y P. Naci na Peru pa violacion di e ley di Droga.

Comments

comments