Aki ta sigui cu un resumen di casonan den Corte di Prome Instancia pa dia 9 di Maart 2017.
Pa 8’or y mey di mainta, e sospechoso KDBLH, lo presenta dilanti di hues. L.H. ta wordo acusa di intento di homicidio riba 14 di Juli 2016, conhuntamente cu un of otronan. E ta wordo acusa di posesion di un arma di candela riba e mes fecha ey.
Pa 9’or y mey di mainta, e sospechoso ERB lo aparece dilanti di hues. B. ta wordo acusa di a viola un persona riba 10 di November 2016. E violencia a encera cu e, na uniform di polis, a (entre otro) duna e persona ordo pa mustra su paspoort y pa subi den auto di polis, a bise cu e ta bay hibe cera, a hibe na un luga leu, a bise varios biaha cu e ta un polis y cu e tin un pistool, y a haci uso di e desigualdad di poder cu a surgi como resultado di e situacion.
E ta wordo acusa di, den su posicion di ambtenaar y polis, a malversa obhetonan, esta, un chin-up y dos klop, den e periodo di prome di Januari 2009 te 16 di November 2016.
E ta wordo acusa di, a ilegalmente haci doño di 60 bala y un cachipora.
Pa 10’or y 45, e sospechoso OLJ lo aparece dilanti di hues. E caso aki ta uno pro forma. Es decir, cu hues lo bay dun’e otro fecha pa e wordo trata. J. ta wordo acusa di, den e periodo di 2 te 18 di October 2016, a comete abuso sexual contra un persona cu e tempo ey tabata menor di edad.
Pa 11’or y 15, e sospechoso ELK lo aparece dilanti di hues. K. ta wordo acusa di, cu e intencion di tuma bida di un persona, a staca varios biaha cu un cuchio den direccion di garganta of pecho di e persona aki riba 7 di December 2016.
Pa 11’or y 50 di mainta, e sospechoso AFC lo aparece dilanti hues. C. ta wordo acusa di exportacion di cocaine, conhuntamente cu un otro of otronan, riba prome di November 2016.