Aki ta sigui un resumen di casonan den corte di Prome Instancia, riba dia 23 di Juni, 2017.
Pa 8’or y 15 di mainta, e sospechoso BDW lo aparece dilanti di hues. E caso aki ta un pro forma. Es decir, cu hues lo bay trata e caso aki riba un otro fecha. W. ta wordo acusa di a hinca un persona varios biaha cu un cuchiu na su cabes y brasa riba 27 di februari 2017, cu e intencion di tuma su bida.
Pa 8’or y 15 di mainta, e sospechoso WAT lo aparece dilanti di hues. E caso aki tambe ta uno pro forma. T. ta wordo acusa di a intencionalmente bende cocaina y hennep di 2 di Maart 2015 te prome di Maart 2017.
Pa 8’or y 15 di mainta, e sospechoso ETS lo aparece dilanti di hues. E caso aki tambe ta uno pro forma. S. ta wordo acusa di asesinato di un persona riba 22 di November 2016, door di, intencionalmente y cu premeditacion y calmo, a pone garnachinan di veneno di djaca conteniendo Brodifacoum, o sea un sustancia venenoso, den un paki di juice di apelsina, despues di cual e persona a bebe un of mas glas y a consecuencia di cual el a fayece.
S. ta wordo acusa di intento di asesinato di un otro persona riba 22 di November 2016, door di pone e veneno di djaca den un juice di apelsina, despues di cual e di dos persona aki a bebe un of mas glas.
E ta wordo acusa di intento di asesinato di un di tres persona riba 22 di November 2016, door di pone e veneno di djaca den un juice di apelsina, despues di cual e persona aki tambe a bebe un of mas glas.
Pa 8’or y mey di mainta, e sospechosonan A.J.J.R., A.V.W., A.K.A.T., J.N.P., L.A., Y.P., lo aparece dilanti di hues. E sospechosonan ta wordo acusa di, conhuntamente cu un otro of otronan, kiebro y ladronicia di un of mas boter di sterki y/of un of mas television y/of cuminda y/of cheques den e periodo di 26 pa 27 di Januari 2017.
P. y A. y P. ta wordo acusa di kiebro y ladronicia di boternan di vodka y cerbes den e periodo di 4 pa 7 di Februari 2017.