Aruba Volleyball Association a organisa su ultimo actividad di beach volleyball pa aña 2017 na Joe Laveist Sport Park durante e weekend cu a pasa pa e categorianan U-16 y damas y cablleros semi-pro.
Den categoria di U-16 un total di 8 Teams a competi cu otro segun e sistema “round robin” y na final e dos miho teamnan a hunga e finale. E finale a bay entre e mucha muhernan Mali y Isabella contra e mucha hombernan Brayaden y Keanu.
E wega final a bay basta preta unda e prome set ta wordo gana pa e mucha hombernan Keanu y Brayaden cu e score di 15-11, mientras e mucha muhernan ta reacciona y ta gana e di dos set cu 15-10. Den e di tres set ningun di e dos teamnan kier a entrega pero finalmente e mucha muhernan Mali y Isabella ta gana 15-13 for di Keanu y Brayaden.
Presidente di Aruba Volleyball Association Sra. Filomena Daniel-Curiel a haci entrega di e medaya y copanan na tanto e Campeonanan como e Sub Campeonnan pa U-16.