Durante accionnan teni den e siman di 28 di November pa 4 di December, Visibility Team tabata tin nan mannan yen, pero trahando incansablemente e team ta haci un trabao impresionante. Hopi biaha ta tende den comunidad cu nos cuerpo di polis no ta haci nada, pero e siguiente raportahe ta mustra net lo contrario.
Dia 28 di November e dia pa e team visibel a cuminsa cu un intento di atraco den Elleboogstraat patras di e muraya di La Linda. Aki choller “G”, cu a wordo reconoci pa su victima, cu a declara cu bahando for di su auto caminda pa su trabao e persona aki a purba di ranca su tas cual no a logra. Despues “G” a pidi 10 florin y cu si no tin anto pa dune 25 florin. E victima a bisa “G” pa stop di molesti’e cu a conduci na un sla di mokete den cara. Na su turno e victima defendiendo su mes a dal e choller bek tres biaha pa asina purba pone core bay. E choller a dicidi di bay y a bolbe bek cu pida palo y a menasa e victima y cu e lo dal su auto kibra. Un rapport a wordo traha y manda pa Recherche D-1 cu awor lo haci siguimento riba e caso.
Otro incidente cu mester a wordo atendi door di Visibilty Team tabata e destruccion di un wielklem banda di Radio Shack. Aki mester a intermedia cu e persona cu a comete e destruccion unda cu a splik’e cu loke cu e la haci ta castigabel pa ley y cu e mester bay haci un areglo cu Aruparking pa paga pa e klem destrui. E persona a dicidi cu e lo sigui e recomendacion di polis.
Dia 29 di November tabata un dia basta trankil pa e team, pero esey no kiermeen cu nan a bay descansa, contrario. E team di surveillance a para na “Maingate” number 3 di Aruba Ports Auhtority (APA) y a tira un bon bista riba tur auto y peatonnan transitando ey banda. Fuera di esey a tene surveillance na pia den e mercadonan chikito rond di waf como tambe den Caya Grandi.
Riba dia 30 di November e team visibel di polis mester a bolbe pa e parkeo patras na Mango unda cu colega di Aruparking a informa nan cu chauffeurnan di diferente auto a haya problema cu choller “G”. E colega di Aruparking a splica nan cu “G” a menasa un chauffeur cu net tabata parkeer. E team a bin topa cu “G” y a papia cune riba su conducta y e la wordo hala for di e luga.
Djey nan a dirigi nan mes pa Diamonds International pa keho di un homber molestioso. Na yegada nan ta topa un turista cu ta declara cu nan a haya un flat tire y mester a drenta den verboden net dilanti Diamonds International pa asina cambia e tire. E ta sigui bisa nan cu su casa a bay busca ayudo mirando cu no tabata tin nada den auto pa cambia tire. Diripiente e meneer a cuminsa papia cu nan, reclamando cu e señora a falt’e respet pasobra e no a cumind’e. Na su turno el a pidi disculpa, pero e meneer no a gusta y a cuminsa bira onbeschoft y a reta nan pa bringa. Pa ora cu a yega na e sitio ya meneer a desaparece. E team a busca e meneer aki den vecindario pero el a laga plama bay.
E team a haya un yamada di centrale post pa atende 3 cabayero jong coriendo rond riba bicicleta cu BB gun y klapchi. E team a bin topa nan na Nicky Beach y a constata cu nan tabata tin e arma y klapchi. Tur cos a wordo tuma den beslag y e 3 hobennan a haya nan mes sinta den auto di polis unda nan haya un bon scual y nan mester a bay immediatamente for di e lugar. E material confisca a bay warda pa pasa e proceso di wordo destrui.
Riba dia 1 di December Visibility Team mester a acudi na oficina di Aruparking unda un colega a splica nan cu un meneer cu no tabata kier a paga tabata birando fastioso den e oficina na Wilhelminastraat. Nan a papia cu e persona envolvi riba su actuacion y mesora e meneer a cuminsa grita cu e mester bay DIMAS pa un cita y cu e tabata laat caba. Mirando cu e persona no tabata kier a calma y cu riba dje e no tabata tin un permiso cune a dicidi di mande pa Guarda Nos Costa pa mas investigacion.
Mirando cu e barco crucero “Star Breeze” tabata drentando waf riba dia 2 di December e team a dicidi di tene un surveillance na pia na e maingate di APA y vecindario y tambe nan a tene bista den Playa.
E accionnan di control na pia y den auto a sigui riba dia 3 di December unda cu Visibility Team a sigui controla rond di waf y vecindario como tambe na e mercadonan chikito. Algun chauffeur iresponsabel a haya boet.
Terminando e siman, dia 4 di December, nan mester a acudi na Wilhelminapark pa e conocido choller “Leito” cu tabata molestiando na e lugar. E team a bin hay’e banda di Digicel y a papia cune y mande bay for di eynan mesora.
Durante control banda di cas di Gabinete di Gobernador otro conocido di polis “Loyd” a wordo encontra. Miembronan di e team a papia cune y hib’e for di eynan.
Na e maingate di APA otro choller “John” tabata drumi riba un di e bankinan. E team a lant’e for di soño y a pone move mesora.