Willemstad – Dia 8 di december 2016 e Colegionan di supervision financiero (Cft) a tene den colaboracion cu Universidad di Corsou dr. Moises da Costa Gomez e seminario “Towards Sustainable Public Finances”. E seminario tabatin como obhetivo fiha atencion di un publico grandi riba importancia di finansa publico sostenibel na termino largo. Tabatin participacion di diferente specialista, invitado y persona interesa cu a bin di tur e paisnan di den Reino Hulandes.
E oradornan
Di parti di IMF Sr. Xavier Debrun a tene un exposicion extenso tocante kico exactamente ta compronde bou di finansa publico sostenibel y cua ta e factornan cu tin influencia riba dje, manera e tipo di interes, e crecemento economico y e saldo di presupuesto. Ademas Sr. Debrun a ilustra cu e cantidad di pais cu reglamentacion tocante presupuesto y supervision a crece espectacularmente durante e ultimo dos decadanan te yega na casi 125. Tambe Sr. Debrun a indica cu mester deal cu finansa publico na un manera prudente pa garantisa su sostenibilidad. Al respecto el a enfatisa cu grandura di e debe ta di crucial importancia den caso di e pregunta si finansa publico ta keda sostenibel na termino largo tambe. P’esey Sr. Debrun ta recomenda pa fiha un grandura maximo di e debe como norma pa e presupuesto. Un obhetivo cu ta keda bou di e norma aki ta percura pa keda suficiente espacio di maneho efectivo pa absorba golpinan economico.
Pa analisa e imagen den e contexto Curasoleño Ministro demisionario di Finansa di Corsou, José Jardim, a presenta di un banda un argumentacion conceptual tocante finansa publico sostenibel pa Corsou y di otro banda un elaboracion di e concepto ey pa medio di diferente escenario dirigi riba practica diario. El a expone e vision ey a base di un retrospeccion historico di finansa publico sostenibel denter di Antia Hulandes. Mediante extrapolacion di e cifra di crecemento economico pa e situacion actual di Corsou, Jardim a indica un di e dos variabelnan na cua mester acopla formulacion di e cuota di debe. Sr. Jardim a suministra e siguiente variabel ora di formula e cuota di debe, esta e interes riba emision di bono, pa medio di un ilustracion extenso di e saneamento di debe y e normanan financiero nobo stipula den e Ley di Reino tocante Supervision financiero. Sr. Jardim a argumenta a base di e dos variabelnan aki cu un cuota di debe no mag di ta un norma generico, sino cu mester hacie specifico, pa motibo di e diferencianan den e variabelnan, cu mester atribui na e situacionnan separa den cualnan e paisnan ta.
For di e analisis di Sr. Jardim a sali na cla cu, a base di e interes actual den combinacion cu e crecemento economico actual, un cuota di debe pa Corsou den careda di 40% ta sostenibel na termino largo. Tambe Sr. Jardim a trece padilanti cu e regla presupuestario di un servicio ordinario ekilibra, cu Corsou tin, ta mas efectivo den un entorno di tipo di interes abou den combinacion cu crecemento economico abou.
Discusion den panel
Despues di lunch e discusion den panel a tuma luga bou di direccion di Ivan Kuster (ex-secretario general di Ministerio di Finansa). Ademas di e dos oradornan, Ersilia de Lannooy (director di CBCS), Candia Joseph (director di SOAB Sint Maarten) y Etienne Ys (ex-Ministro Presidente y ex-Ministro di Finansa di Antia Hulandes) a participa na un discusion den panel masha anima tocante e tema di finansa publico sostenibel. Durante e discusion den panel a bin padilanti cu tur miembro di e panel ta pro norma presupuestario extra pa asina garantisa sostenibilidad di finansa publico na termino largo. Al respecto reglamentacion presupuestario mester ta specifico pa cada pais. Pa e norma di cuota di debe tabata reina e pensamento cu, en bista di e caracteristicanan similar di e paisnan Caribense di Reino Hulandes, denter di un periodo stipula lo por fih’e na un balor calcula di mas o menos 40% pa e tres paisnan.
For di den publico a bini e pregunta con por stimula crecemento economico. For di den panel a contesta riba esey cu net awor ta toca sector priva pa realisa crecemento economico. Gobierno ta crea e condicionnan esencial pa crecemento economico, pero na e momentonan aki ta particularmente sector priva ta esun cu mester innova y inverti.
Clausura
Na final presidente di Cft, Age Bakker, a gradici e oradornan y e miembronan di panel pa nan exposicion y discusion franco tocante con por yega na finansa publico sostenibel den Reino Hulandes y con por manten’e tambe na termino largo. El a indica cu e consenso entre e oradornan y e miembronan di panel ta forma un base solido pa drenta den combersacion cu e paisnan tocante introduccion di un norma di cuota di debe den legislacion di e paisnan.