QUITO, Ecuador- E restonan mortal di Paul Rivas, Javier Ortega y Efrain Segarra, integrantenan di e ekipo periodistico di e corant El Comercio a yega Ecuador. E ekipo periodistico a wordo asesina na Colombia y nan restonan mortal a wordo repatria pa Ecuador diaranson.
E cahanan cu e restonan mortal a wordo traslada den un avion di e Forsa Aereo Ecuatoriano (FAE) cu a sali for di aeropuerto Alfonso Bonilla Aragon, ubica na 20 km di Cali, ciudad di Colombia y a yega aeropuerto Mariscal Sucre, di Quito, unda cu na a wordo ricibi pa famia, amigo y coleganan.
E curpanan di Rivas, Ortega y Segarra a wordo haya diahuebs ultimo, dia 21 di juni den un zona rural di Tumaco, den e frontera entre Colombia y Ecuador. Esaki a wordo confirma pa e mandatario Colombiano, Juan Manuel Santos.
Despues di e hayasgo, e cadavernan a wordo traslada pa e ciudad di Cali, unda cu e oficina di Criminalistica a realisa pruebanan di DNA pa asina confirma nan identificacion.
E velorio di e restonan mortal di e tres integrantenan di e ekipo periodistico di e corant El Comercio lo ta diaranson mes den e Memorial Necropoli, di Quito.
Despues nan lo wordo traslada pa e oficinanan di e corant El Comercio, sur di e capital Ecuatoriano, unda cu tambe nan lo ricibi un homenahe.
Diabierna 29 di juni, nan lo bolbe bek na e Memorial Necropoli, unda cu e tres Ecuatorianonan lo wordo dera.
Rivas, Ortega y Segarra a wordo secuestra dia 26 di maart ultimo pa e frente Oliver Sinisterra, un grupo lidera pa Walter Patricio Arizala, alias ‘Guacho’. E empleadonan di e corant tabata realisando un cobertura riba e intensificacion di e atakenan na e frontera cu Colombia, na Mataje, provincia di Esmeraldas.
Dia 3 di april autoridadnan a ricibi e unico prueba di vida di e tres periodistanan secuestra, cual a wordo manda pa e captornan na medionan di comunicacion. Den e material aki nan tabata pidi yudansa di gobierno Ecuatoriano pa nan liberacion.
Despues di 18 di secuestro, e presidente Ecuatoriano, Lenin Moreno, a confirma cu nan a wordo asesina.
Fuente: RT Actualidad