WASHINGTON, Merca- E Instituto Mericano di Petroleo (API na Ingles) a raprota un acumulacion inespera di 629 mil bari di petroleo den e inventario di Merca, siman pasa. Esaki a pone cu e prijs di petroleo a cay un poco.
Segun Reuters, e futuro di petroleo Brent a registra 71.85 dollar pa bari, cu’n caida di 0.4%, mientras cu e prijs di WTI a yega na 68.08 dollar pa bari, cu ta un caida di 0.5%. Ambos prijs ta bou di e prijs di petroleo di siman pasa na 6 y 7 dollar respectivamente.
Despues di mas di un aña di produccion controla, e Organisacion di Paisnan Exportado di Petroleo (OPEP), hunto cu otro productornan manera Rusia, a yega na un acuerdo pa aumenta e produccion te na un miyon bari pa dia, desde e luna aki.
Debi na cortenan den suminsitro na Venezuela, y e riesgo di sancionnan na Iran, analsitanan cada biaha ta wak mas possible cu Merca haci uzo di su reserva petrolero strategico (SPR).
“E motibo principal di caida significativo di prijs tabata e discussion riba e Liberacion di SPR, cu ta birando mas fuerte”, segun The Wall Street Journal.
Anteriormente, desde Teheran nan a califica como un “eror” di pensa cu e “giera economico di Merca contra Iran lo no tin niun impacto y a priminti di “bende mas tanto petroleo posible” a pesar di e sancionnan Mericano.