“Renobacion di enseñansa ta bay haya mas atencion ainda den siguiente gobernacion di AVP. E miho oportunidadnan den economia di Aruba den futuro lo ta den dunamento di servicionan di calidad halto cu ta rekeri conocemento y habilidadnan specialisa. Nan lo ta trabounan cu ta rekeri mas estudio, mas creatividad, actitudnan di mas iniciativa y di busca solucionnan nobo. Pa sigura cu hopi mas di nos studiantenan yega na e trabounan ey, nos enseñansa mester bay duna mas y miho oportunidad na tur studiante y nos enseñansa mester move ainda mas di conocemento tradicional pa conocemento y habilidadnan creativo y di soluciona problemanan den forma innovativo. Y mester haci e transicion aki lihe. E economia di futuro ey a cuminsa caba.” Asina Rene Herdé di AVP a bisa den un splicacion na un grupo di studiante y nan mayornan siman pasa. E studiantenan ta preparando pa scoge un estudio ora nan caba scol secundario. Nan kier sa kico pa bay studia cu ta duna nan oportunidad den economia na Aruba den futuro.
MANTENCION & INOVACION
Den e ultimo ocho aña Gobierno mester a inverti masha hopi den asuntonan den enseñansa cu a wordo neglisha pa mucho hopi aña. Pesey mester a inverti hopi den mantencion y renobacion di infrastructura di enseñansa. A renoba scolnan cu tabata den mal estado pa mucho hopi tempo. Tambe a traha scolnan nobo caminda tabata tin mester. Asina mes e renobacion di contenido di enseñansa tambe a haya atencion. E sosten y awor expansion di e scolnan multilingue, pa sigura un miho dominio di e idiomanan necesario, pa exito den enseñansa y den bida. Tambe e introduccion di “metanan central” (“kerndoelen”) den enseñansa basico ta algun ehempel di e renobacion di contenido y proceso di enseñansa. Awor cu e condicion fisico di scolnan ta na un nivel hopi miho, por bay pone hopi mas atencion na renobacion di e structura, proceso, contenido y formanan di duna les den nos enseñansa. Mientrastanto lo sigui mantene e condicion fisico di scolnan na e nivel desea.
INNOVACION & TECNOLOGIA
Uzo di tecnologia den enseñansa di futuro ta sigur. Pero tecnologia (= Apps, Ipad, Smartboards, etc) den enseñansa lo ta instrumentonan necesario pa aumenta eficiencia, standardisa calidad, optimalisa acceso na fuentenan di informacion y comunicacion. Rene Herdé: “Tur esakinan ta necesario den e enseñansa di calidad cu nos mester sigura tur studiante. Pero sin un plan integral pa mehora henter nos enseñansa, e instrumentonan aki lo keda limita den nan contribucion. E plan integral pa renoba nos enseñansa mester sigura cu ta elimina obstaculonan cu awor ta haci cu ainda mucho hopi mucha ta keda presta bou di nan nivel, ta stop di studia mucho tempran y ta keda limita pa resto di nan bida. E plan integral ey mester sigura mas variacion di oportunidad y sali mas di e realidad economico y social di nos pais. Asina nos ta sigura cu hopi mas hoben ta presta mas hopi, ta yega na estudionan avansa y nos pais ta sigui desaroya cu nos propio hendenan. Mas miho un hoben presta den enseñansa, miho su oportunidadnan ta riba mercado laboral y mas sigur e ta riba un bon entrada henter su bida y un bida stabil durante henter su carera. Hasta riba un miho pensioen ora e stop di traha.” Si no mehora calidad di enseñansa, mucho hopi oportunidad ta bay perdi pa nos hobennan y pa nos pais segun Rene Herdé. Rene Herdé: “Awor cu nos pais ta renobando riba tur tereno economico y social, nos enseñansa mester renoba hunto cun’e pa carga e economia nobo ey den futuro. Pesey ta awor nos mester sigui renoba y hisa calidad di nos enseñansa mas! Den futuro, ainda mas cu den pasado, ta e calidad di nos enseñansa cu lo determina nos calidad di bida.”