“Durante di e reunionnan entre parlamentonan di e cuatro paisnan di Reino a papia dos biaha riba e tema importante di integridad den gobernacion. Pero loke e lider di MEP a declara na prensa na Aruba y e impresion cu ela purba crea, no ta loke a sosode na Hulanda. Lamentabelmente atrobe mi tin cu corrigi’e.” Asina Rene Herde’, presidente di e comision di Asuntonan di Reino di Parlamento di Aruba a declara na prensa. Mas den siman e lo duna mas informacion. Pero e kier a cuminsa mes ora pa corigi e impresion robes cu e lider di MEP a purba crea aki na Aruba.
INTEGRIDAD
Tur miembro di e delegacion di e cuatro Parlamentonan di Reino a mustra riba e importancia di integridad den gobernacion y cu mester sigui pone atencion na esaki, pasobra den tur cuatro pais tin di haber cu retonan di integridad den gobernacion. Enbes di punta dede riba otro, a palabra cu ta inventarisa e temanan di integridad cu tur cuatro pais ta haya cu ta esencial pa regla esaki den nan propio ley y reglanan. A scohe pa cada pais mes regla esaki y no regla esaki riba nivel di Reino of pa laga Gobierno di Reino impone esaki riba e cuatro paisnan. E realidad ta cu cada uno di e paisnan di Reino tin reto y incidentenan riba tereno di integridad. A scoge pesey pa hunto sigui atende cu e tema aki entre e Parlamentonan cada biaha cu topa y intercambia di experiencianan pa mehora e nivel di integridad den gobernacion den tur nos paisnan.
LISTA
E lista di tema cu a palabra cu cada pais lo traha riba dje ta encera e siguiente topiconan:
Un regla of ley pa preveni hortamento di asiento den Parlamento door di hende cu ta dicidi di sali di nan fraccion y bay cu e asiento cu ta pertenece na e partido.
Un codigo di etica pa conducta di politiconan cu lo mester inclui transpariencia di funcionnan cu politiconan tin banda di nan funcion oficial, transpariencia financiero di cada politico y registracion di regaldo of donacionnan cu politiconan ta haya.
Un ley di screening di candidatonan pa minister y parlamentario.
Un ley pa regla financiamento di partidonan politico.
Rene Herdé: “Contrario na loke e lider di MEP ta bisa, Aruba no ta cana atras riba e tema aki. Al contrario. Aruba ta pais cu a cuminsa prome cu e regla y leynan di integridad aki. Awe nos tin un ley di screening di candidato pa minister. No un desicion gubernamental cu por pone un banda manera MEP a traha. Tin dos concepto di ley pa financiamento di partidonan politico cla. Tur dos ta di e fraccion di AVP. Durante di 8 aña di MEP nan no a ni toca e tema aki. Tin un concepto pa e codigo di conducta pa politiconan. Pa stop e hortamento di asiento tin cu traha un ley of trece cambio den un ley of reglamento di orden existente. E impresion cu ta te ora un ley ta cla bo por haci algo pa mehora comportacion integro tampoco ta corecto. Pasobra paisnan cu tin tur sorto di ley y regla tambe ta sigui haya problemanan di integridad di politiconan. Kiermen cu ta cerca e politiconan mes e comportacion integro mester cuminsa. Ley y reglanan ta pa desencurasha mal comportacion y encurasha bon comportacion. E impresion cu e lider di MEP kier crea, esta cu durante di e reunionnan di IPKO, Aruba lo a wordo mal mira, critica o acusa di ta riba mal caminda, ta totalmente incorecto. Niun momento y niun caminda esey a sosode. E lider di MEP tin derecho di tin su propio opinion riba tur cos. Pero e echonan y e realidad ta keda loke nan ta. E no por troce e berdad y crea echonan cu no a sosode.”