E presupuesto pa 2017 cu Gobierno a entrega dia 1 di September ultimo, ta cuadra cu loke ley ta prescribi: e mester wordo entrega pa dia 1 di September di e aña anterior. Esaki ta e prome biaha den hopi aña cu un Gobierno di Aruba ta entrega e presupuesto na tempo. Den e luna di November e presupuesto lo wordo trata den Parlamento di Aruba. Esaki ta djis un di e hopi indicacionnan cu tanto finansas publico di Aruba, como e administracion financiero di e aparato di Gobierno a mehora enormemente bou di gobierno di AVP.
Un otro indicacion di cu e maneho di finansas ta canando hopi bon ta cu e deficit ( = e falta di placa riba presupuesto) a sigui baha. Pa 2017 e deficit lo baha te na 0.5%. Exactamente manera a fiha como meta algun aña pasa! Cu algun aña pasa ya por a planea y traha pa yega na un deficit di apenas 0.5 %, ta un indicacion di un bon calculacion di entradanan di Gobierno y un bon maneho di gastonan. Un maneho balansa y responsabel den contexto real di bida na Aruba!
DEFICIT
Un di e puntonan mas importante di e maneho di finansas ta e trayecto pa yega na presupuestonan balansa. Masha hopi pais ta desea di yega na e punto di un presupuesto balansa, esta cu e entradanan ta cubri tur e gastonan. E ora Gobierno no tin cu fia placa pa cubri gastonan regular, pero solamente pa haci inversionnan grandi. E deficit riba e presupuesto di nos pais pa masha hopi aña tabata mucho halto, cu ta nifica cu e entradanan di Gobierno no tabata yega pa cubri e gastonan. Gobierno mester a baha gasto y subi entrada pa yega na un presupuesto balansa.
SIN MEDIDA
Gobernacion di MEP tambe a purba yega na un presupuesto balansa, pero nunca a logra. Anto esey ta apesar di cu den tempo di MEP gobierno a haya hopi mas placa na entrada. Ariba dje Gobierno di MEP a tuma un sin fin di medida pa haya extra placa. Pero ni asina MEP a yega na presupuestonan balansa. Gobierno di AVP ta yegando na presupuestonan balansa, sin tuma medida. AVP a bisa semper cu no ta husto pa Pueblo paga pa malgastamento di gobiernonan di MEP. Pesey, enbes di tuma medida estilo MEP, Gobierno di AVP a stimula economia, inverti den proyectonan grandi y valioso pa nos pais, crea mas cupo di trabou y subi entrada, SIN TUMA NIUN MEDIDA CONTRA PUEBLO. E resultado den e presupuesto ta cu e deficit pa 2017 lo ta manera palabra: 0.5%
BALANSA
Segun e plan di gobierno di AVP, e presupuesto pa 2017 lo mester ta e ultimo presupuesto cu un deficit. Presupuesto 2018 lo mester tin 0% deficit of posibelmente un surplus di 0.5%. Hunto cu esey economia di Aruba lo haya forsa nobo cu e apertura di e refineria. Esey ta nifica cu economia lo crece mas, lo crea mas cupo di trabou y lo tin mas placa den Pueblo. E proceso di trece finansas y economia di Aruba bek den balansa, ta exactamente loke AVP a fiha como meta na 2009. E tempo ey e economia a cay cu 15 %, desempleo a subi te na 12%, entradanan a keda stagna, e refineria a sera y no tabata tin inversionnan nobo. Awe tur esey a bolter full. Esaki ta e maneho cu gobierno di AVP a priminti. AVP A bolbe cumpli!