Cifranan real di instancianan responsabel no ta laga espacio pa discucion. Mientras cu MEP ta sigui purba sconde y troce e berdad, analisisnan ta mustra e realidad cu nos tur tin cu acepta. E cantidad grandi di hende cu a perde trabou bou Gobierno di MEP a yega nivel record na 2009. Mientras cu un porcentahe di 5% ta mas o menos e nivel acustumbra di desempleo na Aruba (pero ainda mucho halto), na 2009 bou di MEP el a yega 12%. O sea 6000 hende y famia sin trabou. Ora e refineria a cera so caba Aruba a perde rond di 600 cupo di trabou. MEP nunca kier papia di esey. Pio ainda. Ora di vota pa habri e refineria na 2011, MEP a vota contra, sabiendo cuanto hende tabata warda pa haya trabou. Asina importante MEP ta haya trabou. Te awe e moda cu MEP a causa ceramento di e refineria ta persigui nan.
IMPORTANCIA DI TRABOU
Gobierno di AVP a hiba un maneho cu dos meta specifico: stimula economia y crea trabou. E resultado di e maneho aki ta awe na 2017 cu economia a crece cu 13-16% den 7 aña y a crea casi 3000 cupo di trabou. Esey ta sin conta e cuponan di trabou cu e re-apertura di e refineria lo crea. Pa MEP perdida di cupo di trabou di nos trahadornan obviamente no tin balor. Ta con otro por splica cu nan a vota contra di apertura di e refineria. Rene Herde di e fraccion di AVP ta splica e importancia di trabou: “Pa AVP cada cupo di trabou nobo ta un famia mas cu entrada! Ta pesey a inverti den renobacion di bario y cayanan, den renobacion di centronan di ciudad, den e Green Corridor y e Watty Vos Boulevard, den renobacion di scol y edificionan cu MEP a laga na ruina. E proyectonan aki a crea trabou pa nos hendenan. Y cada trabou a trece pan, paz y siguridad den cas. E ta duna e famia e oportunidad di cumpli cu su necesidadnan y e speransa di sigui traha pa progresa mas. Esey ta un di e motibonan tambe cu a persisti den busca moda pa habri e refineria. Creasion di trabou tabata y lo sigui ta un prioridad pa AVP. Ta pesey nos a traha pa crea ya mas cu 3000 cupo di trabou. Y tanten cu tin hende sin trabou, nos trabou ta sigui!