Remigio Wever: Ley di trechter? Smal pa mi, pero hancho pa bo?

0

Cu hopi interes mi a tuma nota di locual Sr. Jan de Ruijter, presidente di e fundacion “Nos ta Aruba”,  a vocifera den Solo di Pueblo, riba pagina 13 di su edicion di diabierna, dia 7 di april ultimo.
Aki Solo di Pueblo, na idioma Hulandes, a publica contenido di e carta, fecha 3 di april 2017, firma pa sr. de Ruijter, y dirigi na procurador general di Ministerio Publico (O.M.), esta mr. A. van Dam.
Aki ta sigui un presentacion na Papiamento di e articulo, manera esaki a ser publica den dicho Solo di Pueblo di dia 13/4/’17.
E contenido ta papia pa su mes!

FUNDACION  “NOS  TA  ARUBA” TA  INSISTI  RIBA  DETENCION  INMEDIATO  DI  PAUL  CROES:
Den su introduccion sr. de Ruijter ta referi na su keho y su peticion di dia 22 di december 2015 na Ministerio Publico (Openbaar Ministerie – O.M.), pa O.M.  realisa un investigacion riba locual a ser constatá na fraude, corupcion y negoshi door di minister Paul Croes, relacioná cu permisonan di trabao pa trahadornan for di exterior.

Djey Sr. de Ruijter ta sigui:
E “honor, e bon nomber y e integridad” di  Paul Croes.
Sr. de Ruijter ta relata riba e caso sumario cu minister Paul Croes a entama contra su persona, esta Sr. de Ruijter y Solo di Pueblo, pa motibo di supuesto ofensa y daño na su bon nomber (“smaad”), su honor y su integridad.
Manera ta conoci, dia 2 di maart 2015 minister Paul Croes a perde e caso aki dilanti di mesa berde!
Locual tambe ta papia pa su mes ta cu minister Croes NO a bay den “hoger beroep”!

Menasa  y  intimidacion  di  sr.  de  ruijter  door  di  ministerio  publico.
Sr. de Ruijter ta informa procurador general cu despues di esaki, e (de Ruijter) a ricibi un carta di  Officier van Justitie mr. Bart Schultz, den cua esaki (Schultz) ta avisa (“sommeer”, “strongly suggest”, menasa??) sr. de Ruijter, pa esaki (de Ruijter) ”make sure” pa durante e proximo 24 (binticuatro!) lunanan, pues te cu september 2017, e LUBIDA di duna critica pisa riba tanto e gobierno como riba minister Croes, sino e (de Ruijter) lo wordo persigui pa motibo di ofensa, etc. (“smaad”).
De Ruijter ta considera e carta di O.M. aki como un menaza y un chantahe, y contra esaki ela yega di protesta energicamente caba.
Y awor aki ta resulta y ta ser proba cu de Ruijter NO a haci su mes culpabel na ofende ningun hende, pero cu ela trece e berdad padilanti!
E  ROL  DI  MINISTERNAN  SEVINGER  Y  EMAN:  PROME  MINISTER  TA  CO-CULPABEL ??
Awor cu tanto procurador general van Dam como hoofdofficier Olthof a dicidi toch pa cuminza cu un investigacion, nos di “Nos ta Aruba” ta duna O.M. un pabien cu esaki, pero na mesun momento nos ta haci O.M. e pregunta kiko akiden tabata e rol di e minister di Integracion Benny Sevinger, pasobra e tabata esun cu lo a firma e permisonan fraudulento, y kiko tabata e rol di prome minister Eman, pasobra e tabata sa di e negoshi di permiso aki, sigur por lo menos desde dia 22 di december 2015, dia cu de Ruijter a haci su keho y su peticion na O.M.
Si desde dia 22 di december 2015 Prome Minister deliberadamente a nenga di haci algo al respeto, e ora ey ta bisto toch cu Mike Eman tambe ta co-responsabel pa motibo di a facilita (haci posibel, permiti) e fraude, e corupcion, y e negoshi den e asunto aki? Y esaki e ora ey no ta hacié co-partícipe y pues co-culpabel?

E detencion  di  Paul  Croes
Sr. de Ruijter djey ta compara e caso di O.M. contra minister Paul Croes, cu e caso di mesun O.M. contra Sr. Roland Orlando Croes, kende, manera ta conoci, desde december 2016 ta sera den KIA (den “voorarrest”), esaki pa motibo di supuesto “oplichting, bedrog y valsheid in geschrifte”, y cu un sospecho pisa di culpabilidad.
Un sospecho serio y pisa di culpabilidad lo mester significa y encera, cu O.M. ta pasa pa detencion, di manera cu ningun documento por ser destrui y tampoco e sospechoso por pensa di intimida ningun hende.
Pero…e principio di igualdad (“gelijkheidsbeginsel”; ley pa un, ley pa tur!) ta prohibi O.M. pa trata minister Paul Croes otro cu e ta trata Roland Croes, djis pasobra e, Paul Croes, tin un posicion mas halto den comunidad.
Den e caso di Roland Croes ta trata di un sospecho fuerte di culpabilidad; pero tur cos ta mustra cu cerca minister Paul Croes e sospecho pisá ey tambe ta existi.
Pasobra si esey no tabata e caso, con bo kier splica anto pakiko e instituto Hulandes FIOD, e “Koninkrijks- Samenwerkingsteam” y e ” Koninklijke Marechaussee”, TUR  TRES a ser envolvi den e caso di e minister??
Esey nunca por a sosode “just like that”, y si no tabatin motibo- y razonnan urgente y cu peso toch!?
Aki ta hopi bisto cu O.M. a midi cu dos diferente midi, y huridicamente esey no ta permiti!
Den otro palabra: si esun ta sinta den KIA, e otro tambe mester ta eyden!
Pues, nos di “Nos ta Aruba” no ta “verwacht” nada otro, cu O.M. ta coregi nan eror aki, y cu “as yet” ta procede na detencion di minister Paul Croes.

Finalmente “Nos ta Aruba” ta pone na disposicion di O.M. tur datonan cu nos fundacion tin encuanto e negoshi aki di permiso, y ta ofrece tur ayudo pa yega na finalisacion di e caso aki.

Copia di e carta na procurador general di O.M. a bay pa tur e instancianan concerni, tanto na Aruba como na Hulanda.