Tin hopi desaroyonan tumando luga na Aeropuerto, en bista di e renobacionnan gigantesco cu lo mester tuma luga. Pero pa loke ta trata e relacion entre sindicato cu e gerencia di Triple A, e relacion ta basta bon balansa, aunke cu tin un grupito cu ta bruhando tera. Sr. Diego de Cuba, ta splica mas.
Pero por a compronde cu tin un grupito cu ta bruhando tera na Aeropuerto y ta pa e mesun motibo ey, Sindicato STA a saca un comunicado pa refresca memoria di esunnan na Aeropuerto. Sindicato STA ta gosa di un sosten amplio na Aeropuerto, pero lo kier preveni cu mester ripiti e sucedido di algun aña atras, caminda cu Sr. Julio Quijada, d.f.m., cu mester a bay referendum. Door di esaki, a publica tur e logronan cu e sindicato tabata tin den transcuros di e añanan cu e actual directiva ta na mando.
Apesar mas hende ta afilia na e sindicato nobo, toch niun hende no ta bin papia directo cu directiva di STA. Tin un wega di kak’i sconde tumando luga, segun Sr. Diego de Cuba. Loke nan no sa, si esaki tin motibonan politico tras di esaki. Pero STA kier a manda un advertencia, cu STA ta un sindicato na defensa di e clase trahado. Dus sindicato STA no tin color politico, aunke tin hendenan den STA cu por tin cualke faboritismo politico, pero como sindicalista mester ta neutral. STA a demostra democracia den su totalidad.
Biaha pasa cu a bay referendum STA a lastra e otro sindicato. Tin trahado ta sostene e sindicato, aunke cu nan no ta afilia na dje, ya cu nan sa di e logronan di e sindicato pa e trahadonan di Aeropuerto. Esakinan ta cosnan cu a beneficia tur hende den e compania. Ultimo tabata e spaarplan di Aeropuerto, cu STA a bin cun’e. Esaki tabata algo cu STA tabata tin hopi aña ta bringa pe. Sr. Diego de Cuba ta haya hopi laf, cu tin cierto grupo den Aeropuerto, ta purba influencia e jongnan cu recien a drenta traha na Aeropuerto. Si tin metemento di politica den esaki, Sr. de Cuba ta splica tocante AGS, unda cu e director anterior no a paga loke mester a paga na belasting. Pa evita bancarota di compania, e tempo ey un grupo chikito a bandona STA y a afilia na otro sindicato.
Pero e grupo aki a perde tur nan beneficionan. Nan contracto colectivo a bay “down the drain”. Empleadonan di Triple A no tin ningun motibo pa pasa den dje. Tambe Sr. de Cuba ta bisa cu esun cu kier reunion, ta liber pa pidi esaki. Ta spera cu no tin metemento di politica. Despues cu e trahadonan di Aeropuerto lesa e comunicado, cu nan realisa cu STA semper a traha na beneficio di e trahadonan di Aeropuerto y no esunnan cu ta cay bou di contracto colectivo so, pero tambe pa esunan cu tin contract individual.
Gerencia tambe ta complice, ya cu nan ta laga e situacion sigui. E CAO tin un valides di 4 aña y 2017 ta e di dos aña y si mester wak tur e ingredientenan cu e contracto colectivo tin y si mira tur e resultadonan cu STA a logra. Sindicato STA ta un sindicato democratico. Prome cu a bay over na e ultimo contracto colectivo, tur cu ta miembro di STA tur mester a vota, cu tin un mayoria absoluto pa acepta e contracto colectivo. Y durante e votacion, 100% di e miembronan a vota PRO e contracto aki. Sr. de Cuba, ta sigui bisa cu e no sa si por si acaso placa a caba, cu e hendenan ta cay den desesperacion. Ta di lamenta e situacion actual na Aeropuerto, y gerencia ta na altura tambe. A splica gerencia cu locual cu STA a publica ta netamente e logronan di e sindicato. No tin nada contra di gerencia.
Loke ta trata pensioen di e empleadonan di Triple A, ta un division tin, entre e grupo cu ta den APFA y e otro cu ta den Guardian. Pero e contract cu Guardian Group ta termina na 2018 y ta hopi caminda ainda tin pa bay.
Ya caba tin un acuerdo, y esaki ta hinca den protocol. STA lo sinta na mesa cu gerencia, pa asina wak cual ta beneficia e trahadonan y ta esakinan mes mester haci na escogencia, segun Sr. Diego de Cuba, lider di Sindicato STA.