Statuut ta dicta: nacionalidad Hulandes (como un solo nacionalidad indivisible den Reino), e relacionnan externo y defensa ta asunto di Reino. Pa tur otro asunto, gobernacion di e islanan ta autonomo y e islanan ta cuida e autonomia ey.
Segun Armand Hessels di Fundacion Gobernacion di Calidad Aruba, ademas Statuut ta fiha den articulo 43 cu e paisnan autonomo mes ta responsabel pa ‘cumpli cu e derecho- y libertadnan humano, cu siguridad legal y cu calidad di gobernacion’. Pues, desde realisacion di Statuut, esaki a bira un prome y propio responsabilidad di gobernacion. Ademas, Statuut ta bisa den articulo 43 cu ‘e garantia di e derecho- y libertadnan, siguridad legal y calidad di gobernacion aki ta asunto di Reino’. Consecuentemente esey kier men cu Reino por tuma medida si e paisnan autonomo mes no ta percura adecuadamente p’esaki.
Sinembargo, den e cuadro di Reino no a explicita e tres terenonan aki ni e reglanan al respecto. Consecuentemente cada un pais por duna su propio splicacion y contenido. Tampoco a regla mantencion ni supervision di e asuntonan aki cu excepcion di intervencion di Hulanda. Pero ta posibel si pa imagina kico e terenonan aki ta representa.
E habitantenan di Reino, doño di nacionalidad Hulandes, tin derecho riba proteccion y estimulo di gobierno pa cu desaroyo di nan derechonan humano y cierto norma minimo. E balornan comun aki ta forma e base di Reino y mester conta igual pa tur parti den Reino.
Si nos duna mas contenido na e balornan y haci palabracion na unda ta tuma e terenonan menciona den articulo 43 como punta di salida (locual nos por haya tambe den Constitucion di Hulanda y e islanan Caribense) por pensa riba lo siguiente. Den esey Constitucion di Hulanda, Constitucion di e islanan den Caribe, acuerdo internacional, manifiesto di organisacion internacional ta fungi como fuente di inspiracion. Den cuadro di e articulo aki nos ta limita nos mes na e punto di atencion special di Fundacion Gobernacion di Calidad Aruba, esta e tereno di ‘calidad di gobernacion’.
Calidad di gobernacion tin laso hopi estrecho cu siguridad legal. Ciudadano mester por conta cu un gobernacion independiente, confiabel y integro. Gobierno mester trata e fuentenan humano y material di gobierno na un manera integro y responsabel y e mester hiba un maneho financiero structuralmente duradero. Mester asegura e organisacion democratico di e paisnan di Reino. Tambe por pensa na: e derecho pa tur hende pa participa na tratamiento di asunto publico; vota; keda elegi y permiti pa servicio di gobierno.
Un maneho anti-coruptivo tambe ta esencial pa calidad di gobernacion. Por pensa di medida pa preveni y combati corupcion. Esaki ta encera tambe promocion di integridad, honestidad, responsabilisacion y bon gobernacion. Esey ta conta pa tur hende cu ta hunga un rol den e gobernacion publico di pais, tanto empleado publico, gobernante como politico. Ademas e ta encera un codigo di comportacion pa funcionario publico; regla tocante proyecto di gobierno y administracion financiero; medida pa preveni labamento di placa; penalisacion di cumpramento di empleado publico y di malversacion; uzo ilegal of otro tipo di abuso di material di parti di un empleado publico; regla pa preveni influencia no-permisibel; abuso di funccion y enrekicimiento ilegal.
Den e cuadro aki ta rermarcabel cu di tur acuerdo cu ta conta pa henter Reino, e siguiente acuerdo no ta conta pa tur pais den Reino: e acuerdo di Naciones Uni contra corupcion (UNCAC). Lo ta bon si e acuerdo aki tambe lo conta pa tur pais di Reino, como cu internacionalmente ta considera esaki hopi fundamental.
Instituto di Reino
Dentro di Reino ta falta un mecaniso independiente pa supervisa ehecucion y cumplimento. Apenas tin un control mutuo limita; e paisnan autonomo no ta ‘cuida’ otro debidamente. Pues ta parce logico cu lo institui un mecanismo di Reino conhunto y independiente cu participacion di tur cuater pais, cu ta controla cumplimento di e normanan minimo mas otro palabracion. E mecanismo aki por monitoria e recomendacionnan cu ta sali for di e raportahenan (tocante derecho humano) cu ta obligatorio pa Nacionnan Uni.
Un secretariado di Reino mester asisti e Instituto di Reino aki cu por yuda na identifica e mecanismonan di cooperacion. Posiblemente por elabora e idea aki mas amplio, di tal forma cu no ta lanta solamente un secretariado, sino tambe un mediador di Reino y/of un mecanismo pa soluciona conflicto.