BUENOS AIRES , Argentina- Reina Maxima di Hulanda diamars un biaha mas tabata di bishita cerca su tata, Jorge Zorreguieta, di 89 aña. Zorreguieta ta interna na Buenos Aires, den e clinica Fundaleu. Medionan di comunicacion Argentino a filma e yegada di Maxima, compaña door di guardespaldanan Hulandes.
Den weekend Maximo tabata ya caba 24 ora cerca su tata. El a yega diasabra den su pais di origen y a regresa bek Hulanda, diadomingo. Asina medionan di comunicacion Argentino, cu tabata ward’e dilanti di e portanan di Fundaleu, a informa.
E clinica ta specialisa den tratamento di leucemia, cual enfermedad Jorge Zorreguieta ta padece di dje ya pa algun aña caba. Na 2014 el a keda pa un largo tempo interna den Fundaleu, cu ta keda den e mesun caya cu su apartamento.
UPDATE:
Noticianan di ultimo ora ta indica cu tata di su mahestad Reina Maxima, Jorge Zorreguieta a fayece diamars anochi na Buenos Aires. Zorreguita tabata sufri di problemanan di salud durante e ultimo añanan. Reina Maxima, Rey Willem Alexander y nan tres yiunan lo asisti na e acto di entiero cual lo tuma luga den seno familiar.
Fuente: http://www.anp.nl/