CIFA i VAB a traha den estrecho koperashon ku gobièrnu di Kòrsou pa trese mehorashon i adaptashon di leinan pa asina kumpli ku e eksigenshanan internashonal riba tereno di compliance, kontenido i transparensha.
Na 2015 OESO a publiká su rapòrt final riba e project BEPS (Base Erosion and Profit Shifting). E ekspektashon ta ku tur miembro di e OESO Global Forum lo introdusí leinan pa asina kumpli ku e kriterionan di BEPS. A anunsia ku teritorionan ku no ta kumpli ku e kriterionan, lo paresé riba un blacklist, lokual lo tin konsekuenshanan negative pa e ekonomia di e teritorionan aki. Ademas, Union Oropeo (UO) a indiká ku Kòrsou por result riba e blacklist di UO si Kòrsou no kumpli ku e kriterionan di BEPS na tempu. Pa e motibunan aki CIFA i VAB a bin ta promové e introdukshon di e legislashon ku ta sigurá ku Kòrsou ta keda kumpli ku e eksigenshanan internashonal.
Riba 7 di juni Parlamentu di Kòrsou a aprobá legislashon pa introdusí un di e kriterionan di BEPS: esun di Country by Country Reporting. Basá riba e lei aki, entidatnan di kompanianan multinashonal ku ta establesé na Kòrsou, mester emití sierto informashon di nan aktividatnan na Kòrsou.
Otro kriterio di BEPS ta ku teritorionan mester korigí i/òf adaptá nan legislashon pa terminá òf modifiká régimennan ku por keda konsiderá komo preferensial. OECD a indiká kaba ku e E-zone, e régimen di eksportá i leinan ku ta regardá ganashi di Propiedat Intelektual (PI), ta konsistí di aspektonan ku ta keda konsiderá komo preferensial. Pa e motibu aki CIFA i VAB a traha huntu ku gobièrnu pa prepará legislashon nobo pa kumpli ku e kriterionan di OESO BEPS, i asina sigurá ku nos régimennan ta keda revisá na manera faborabel i asina Kòrsou ta mantené un medio ambiente regulatorio sólido, ku ta kumpli ku normanan internashonal, lokual ta útil pa servisionan finansiero i e klima di invershon di Kòrsou en general.
Ganashi di PI
OESO a duna di konosé ku tur teritorio mester adoptá e asina yamá aserkamentu Nexus. Esaki ta un forma di substansha; e aserkamentu aki ta rekerí ku un empresa ta desaroyá su propio PI pa asina benefisiá di insentivonan fiskal pa lokual ta keda generá for di e PI aki. Esaki ta nifiká ku e entrada generá di PI for di kompania A, ku a keda atkerí i no a keda desaroyá den e mesun empresa, no ta eligibel pa un insentivo fiskal. Pa determiná ku un kompania a desaroyá su propio PI, kompania A mester desaroyá e PI internamente, òf subkontraktá e desaroyo aki i supervisá esaki, mientras kompania A ta keda responsabel pa e desaroyo. Entrada di PI ku ta kalifiká lo ta suheto na un tarifa fiskal redusí di 5%.
Eksonerashon di empresa
E entrada di e kompanianan aki, ta keda eksonerá di impuesto. Na luga di un eksonerashon pa e propio entidat, e entrada lo ta suheto na e tarifa di impuesto di 0%. E kambio formal aki ta garantisá ku e kompania eksonerá, bou di e régimen nobo konosí komo ‘Curaçao Investment Company’ (despues: CIC), ta presentá un deklarashon anual di impuesto. Entrada di CIC ta eksonerá di impuesto, basta esaki kumpli ku tur rekisito, lokual lo keda presentá riba e deklarashon di impuesto. E aktividatnan permití tambe konosé un ampliashon: bou di e régimen nobo, un CIC tambe por desaroyá su propio PI. Den e kaso aki, e entrada eligibel di e PI ta suheto na un tarifa di impuesto di 0%. Entrada di PI ku no ta kalifiká ku a keda optené pa medio di e CIC, ta suheto na un tarifa di impuesto general di 22%.
Eksonerashon di eksportashon
E régimen di eksportashon ku a keda introdusí algun aña pasá, no tabata kumpli ku e rekisitonan aktual di OESO pa loke ta trata transparensha i seguridat. Pa resolvé e problemanan aki, e fasilidat di eksportashon lo keda remplasá pa un eksonerashon general pa kompanianan internashonal pa loke ta trata benta di merkansia òf entrega di servisionan na klientenan den eksterior. No por generá ganashi ku bienes ku lokalmente ta na disposishon di konsumidó ekstranhero. Pa e motibu aki e régimen lo no ta aplikabel ora por ehèmpel hür un outo na Kòrsou pa personanan ku no ta residente, òf mantenshon, òf otro servisionan ku ta relashoná ku bienes lokal ku ta pertenesé na un persona ku no ta residente di Kòrsou. E ekshonerashon ta basá riba e prinsipio akordá pa OESO tokante teritorialidat.
E-zone
Despues di evaluashon pa OESO, E-zone lo regresá na su orígen di Free Zone, meskos ku tabata e kaso te ku 2001. E aktividatnan ku por keda realisá ta interkambio di merkansia di i pa e E-zone, meskos ku servisionan realisá den E-zone i servisionan realisá den eksterior, pero ku yudansa di bienes i/òf ekipo di E-zone. No ta permití mas pa realisá aktividatnan ku e-commerce den E-zone. E aktividatnan aki por keda realisá na Kòrsou ahinda ku yudansa di e eksonerashon di ingreso di fuente ekstranhero, basta esaki kumpli ku e rekesitonan stipulá.
Supstansha
E trènd internashonal ta ku kompanianan ku ta operá den un teritorio hurídiko, mester tin presensha reál òf supstansha den e teritorio hurídiko. E supstansha mester ta den proporshon ku e tamaño i karakter di e aktividatnan di e empresa. Esaki ta nifiká ku por ehèmpel un empresa ku un kantidat di invershon básiko ku, si esaki ta pertenesé direktamente na un persona, no ta rekerí muchu tempu i esfuerso, ni muchu supstansha. Na otro banda, e empresanan ku un kapital i volúmen di benta grandi mester tin un kantidat di trahadó lokal i gastunan operashonal, manera por ehèmpel pa espasio pa ofisina i ekipo ku ta den proporshon ku e tempu i esfuerso nesesario pa e aktividatnan di e empresanan aki. E kompania por tuma hende den servisio, pero e aktividatnan sentral mester tuma lugá na Kòrsou. Pa garantisá ku un kompania ta kumpli ku e rekisitonan di supstansha, ta posibel pa pidi pa un deklarashon di e inspektor, ku mester reakshoná riba un petishon dentro di un luna.
BTW
Ku e meta pa garantisá ku e kambionan sugerí ta neutral den bista di e presupuesto, a inkluí algun amienda den e legislashon pa ku impuesto riba volúmen di benta. Benefisionan lokal di un empresa den E-zone ku ta keda debitá un tarifa di 22%, kaminda ganashi di komèrsio internashonal ta paga un tarifa di 2%, ta keda konsiderá komo separashon. Pa e motibu aki a tuma e desishon ku den futuro e ganashi total di un empresa den E-zone lo mester paga e tarifa di 2%. Pero pa motibunan presupuestario e kompanianan aki mester paga 9% di BTW ora nan bende ku kliente lokal. Un kambio similar a keda proponé pa ku e eksonerashon di eksportashon nobo ku ta remplasá e régimen di di fasilidat di eksportashon. Pa motibunan presupuestario lo introdusí un tarifa redusí pa impuesto riba volúmen di benta riba eksportashon. E resultado kombiná di e amiendanan aki – na promedio – lo no superá un karga di impuesto efektivo di 2-4% riba e balor agregá di e komèrsio internashonal òf su servisionan.
CIFA i VAB ta di opinion ku e legislashon modernisá lo ta atraktivo pa invershonnan tantu lokal komo internashonal. Kombersashonnan ku OESO tokante e kambionan den legislashon a tuma lugá kaba. E aspektonan ku den pasado a haña un evaluashon negativo, lo keda eliminá i asina nos lo kumpli ku e eksigenshanan di OESO i UO. Nos ta di opinion ku tur e kambionan aki lo krea un sistema balansá nobo ku lo sòru pa tantu e klima di invershon na Kòrsou komo e parti di hasi negoshi den nos país lo keda atraktivo pa e invershonista!