Gobierno ta papiando di un reforma fiscal, cual ta algo cu San Nicolas Business Association tin pa mas 6 aña caba y awo Camara di Comercio tambe a mustra interes den esaki, mas ainda awo cu e 6% ta drenta na vigor awo. Sr. Ernst Mohammed, presidente di Camara di Comercio ta splica.
Segun Sr. Ernst Mohammed, presidente di Camara di Comercio, esaki ta algo cu mester bin. E ta ariba e compliance di e belasting. Por hisa belasting te cu 15%, pero si no ta cobra esaki, a keda mes leu. Bo ta castiga esunnan cu si ta cumpli y esunnan cu pa añanana largo no a cumpli cu belasting, eseynan toch no ta wordo afecta. Locual cu mester haci pa reforma e belasting, ta cobr’e, na nos frontera. Esey ta locual tur hende ta di acuerdo. Ta paga esaki di un solo biaha y tur hende ta cobr’e. No mester core tras di niun hende pa paga. E sistema actual ta complica y casi imposibel pa follow up ariba dje. Y di tres, si cobra tur placa cu tin ariba caya, e caha di gobierno ta bay drecha un poco mas.
Dos di e partidonan na mando a core campaña cu lo haci cambionan fiscal, y awo cu nan ta den gobierno, no ta sinti cu nan ta traha ariba esaki, y Camara di Comercio lo keda bringa pe, keda wak unda e ta. Na final di dia, Sr. Mohammed ta sigui bisa, pa otro aña nan lo por tin algo mas concreto ariba e idea aki. Pero si kier haci’e corecto, si kier haci’e fair, e ora mester cobr’e na frontera. Esey ta unico modo cu por cobra locual mester cobra, ya cu e sistema actual no ta traha.
Dos aña pasa nan a bin cu’n sistema asina ey, pero el a bay perdi. Pero directiva di Camara di Comercio lo bay papia cu gerencia di SIAD atrobe pa wak con nan por asisti den esaki, ya cu na final di dia ta algo grandi, cu lo no bay pasa aworaki. Pero si tin cosnan cu por wordo haci, pa cuminsa haal in e daño cu ta eyfo, segun Sr. Ernst Mohammed, presidente di Camara di Comercio.