Den cuadro di ta transparente y suministra informacion, mas detaya, di e contract pa huur e facilidadnan di nos refineria, recientemente Refineria di Aruba a topa cu e lider di fraccion di partido MEP den Parlamento Evelyn Wever-Croes. E reunion a bay den masha bon ambiente, den cual a comparti hopi detaye di henter e trayecto largo, intenso pero positivo cu a transcuri den firmamento di un acuerdo final.
Durante e reunion tabata presente e Director di Refineria di Aruba N.V. , Alvin Koolman, hunto cu Sergio Schwengle, gerente di e compania nobo “Fuels Marketing & Supply Aruba” (FMSA) cu ta encarga cu distribucion di combustibel pa avionnan y stacionnan di gasolin riba nos isla. Dicho compania awor ta resorta bou di Refineria di Aruba. Tambe tabata presente den e reunion, algun miembro di e team negociado pa Aruba, esta Glenn Geerman, Phillip de Sousa y Herbert Mensche.
A acorda cu tipo di encuentro asina lo sigui a base regular, pa suministra avance riba e trabounan di renobacion cu a inicia awo bou Citgo Aruba Refinery y cu lo por dura te cu 4 aña largo, prome cu cuminsa opera e refineria como “Mehorador di Crudo” na su capacidad maximo.
Desde dia 1 di October a funda e compania nobo, Refineria di Aruba N.V., di cual Gobierno di Aruba ta 100% doño di tur e accionnan. RdA a bira doño di e facilidadnan, tin e terenonan na su disposicion y ta huur cu Citgo Aruba Refinery. Tambe RdA ta responsabel den e maneho di FMSA den compra, mercadeo y distribucion di productonan petrolero riba nos isla.