Presidente di sindicato STA, Sr. Diego de Cuba dialuna mainta a atende e invitacion di mediador di gobierno pa un reunion tocante e referendum na Elmar.
Nan a ricibi e lista di e trahadonan di Elmar, kendenan por participa na e referendum, cual ta 165 nomber, cual a wordo cuestiona door di STA. Pero segun mediador di gobierno, mayoria di e trahadonan di Elmar, tambe esunnan di staf por vota den e referendum aki, ya cu tin un sindicato eyden, ALVAST, cu ta representa mayoria di hendenan cu ta den posicion mas halto. Nan a haya un splciacion bastante extenso di e situacion na Elmar, y STA no tin problema cu esey, ya cu nan tin mas di 100 persona cu ta miembro di STA. Tin algun hende cu no ta pertenece na ningun sindicato, pero cu si lo bay haci uzo di nan derecho di voto.
Sindicato STA ta lamenta profundamente tur e expresionnan haci door di e vice- presidente di sindicato UEA, cu ta purba na caba cu STA. Sr. de cuba kier recorda sindicato UEA, cu STA ta un sindicato humilde, cu no ta drumi den skochi di ningun compania. Sr. de Cuba no sa di unda nan a saca e CAO di Triple A, cual ta un tremendo CAO, supero bon balanza cu bon beneficionan, cu adelantonan tur aña. No por compara apel cu peer. Triple A ta un compania independiente mescos cu Elmar, nan ta dos diferente ramo y ta full otro cosnan tin den e CAO-nan corespondiente.
Cierto cosnan cu e directiva di UEA ta haci ta pone cu miembronan ta tuma nan retiro di sindicato UEA. Mester bisa cu STA, un biaha mas ta sali na defensa di e clase trahado, ariba peticion di e propio trahadonan. Y STA no tin duda, cu e referendum cu lo mester tuma luga dia 1 di September di 3 or pa 4 or y 30 di atardi, nan no tin duda cu e empleadonan di e compania Elmar lo sali ganador di esaki.
Sindicato STA a participa desde cu e directiva aki a tuma over, mas cu 40 referendum caba, di cual dos di nan a keda empata, faltando un voto pa gana e referendum. Sr. de Cuba no ta kere cu esaki lo bay ta diferente tampoco. Ta implica cu e trabaonan lo bay bira mas pisa pa sindicato STA, pero pa esey nan lo bay amplia e base, haci’e hopi mas grandi pa sindicato STA y nan tin plannan bastante bunita tambe pa e trahadonan di Elmar. Esaki relacionan cu algun cosnan cu falta den nan CAO y depende si gerencia bay di acuerdo. Pero forsa di e trahadonan, falta un paar di cosnan pa agrega na CAO, cual lo ta hopi beneficioso pa trahadonan di ELmar. D
Sr. de Cuba a sigi bisa cu nan ta trankil cu e fecha di 1 di September, pero e trahadonan di Elmar lo tabata kier e referendum mas lihe posibel. STA segun leynan existente, ta bay di acuerdo cu locual cu mediador a bin cun’e y mirando e situacion na Aruba, no ta prudente pa crea panico aworaki. Mas bien e empleadonan lo bay mustra comprension di nan banda, y si no ta asina, si nan kier bay den accion, sindicato STA lo sostene y apoyanan den esaki, pa mustra nan malcontento un biaha mas.
No ta e intencion di sindicato STA pa hinca nan den esey. Si a surgi e pregunta caminda cu dicon e sindicato UEA no por of ta participa den e referendum, y tampoco e sindicato ALVAST. Ta keda na mediador pa dicidi ken por participa of no, pero ley ta bisa cu bo mester tin 50% +1 pa por participa na e referendum, y ALVAST ta sindicato cu ta representa e trahadonan di Elmar cu ta den posicionnan halto.
E referendum aki ta masha importante mes pa e trahadonan di Elmar, paso cu e cambionan por ta radical. Tur dos sindicato por bin den direccion di STA; e referendum aki ta pa full Elmar, ta un solo compania cu’n solo referendum pa tur e trahadonan.
Mediador di gobierno a splica bon cla y STA a bay di acuerdo cu si ta asina, nan lo mester mas miho prepara atrobe. Aworaki tin un CAO valido pa tur trahado di Elmar, a pesar di e hendenan di ALVAST a firma un protocol cu e hendenan cu ta cay bou di Staff, y e protocol ta tene nan un poco dividi cu e CAO existente. Ainda ALVAST, segun Sr. de Cuba no a firma ningun CAO. Dado momento STA lo mester bay handle pa tur dos banda di empleadonan y esey no ta bay ta problema pa STA.
Pa sindicato STA e referendum di 1 di September ta e trahadonan lo haci uzo di nan derecho di voto, nan lo tin e mesun resultado cu nan tin ariba papel aworaki. E propio empleadonan sa esey tambe. Sr. de Cuba ta sorprendi cu e cantidad grandi di empleadonan cu a afilia na sindicato STA. Esey ta un muestra suficiente grandi pa Sr. Dirks cu ta bin cu boca grandi den prensa cu ta purba di kleineer STA, pa e sa cu e empleadonan no kier UEA mas, segun Sr. Diego de Cuba, di sindicato STA a finalisa bisando.