Reduccion drastico den yegada di migrantenan na Europa

0

E cantidad di migrantenan cu a purba yega Europa den 2016 a baha drasticamente na 364 mil persona, cual ta nifica un reduccion di dos tercera parti, compara cu 2015. Esaki ta segun cifranan publica diabierna pa e Agencia Europeo di Warda Costa y Frontera (Frontex).

Segun e informe di Frontex, e cantidad di migrantenan cu a yega e islanan Griego di Egeo a cay na 182.500 persona, compara cu 885 mil persona cu a yega na 2015. Esaki ta un caida di 79%.

Segun ultimo informenan for di Union Europeo,  e reduccion aki ta debi, den gran parti na e acuerdo entre Union Europeo y Turkia, cual a drenta na vigor na Maart aña pasa. Esaki ta encera controlnan mas estricto na e frontera entre Siria cu Turkia.  Y tambe debi na e hecho cu a readmision di migrantenan cu a wordo expulsa for di e islanan Griego.

E crisis humanitario mas grandi ta den Mediteraneo, caminda Siria ta e pais unda mas persona ta purba na yega Europa, riscando nan bida biahando den barconan chikito.

Asina mes, e Oficina di Nacionnan Uni pa Refugiadonan (ANCUR ) a informa cu e cantidad di mortonan riba lama grandi, a aumenta na 5 mil compara cu 3771 di e aña anterior.

En total, segun un Frontex, un total di 503.700 migrante a wordo detecta, compara cu mas di un miyon persona den 2015.