Partido RED ta bay eleccion 2017 pasobra despues di hopi tempo a dicidi pa sigui, despues cu hopi hende a mustra cu nan ta kere den e partido aki, segun Rudy Lampe, kende ta ex Lider di e partido.
RED Democratico, despues di un proceso di reflexion a dicidi cu nan ta bay eleccion na 2017, manera ya indica. Y tambe a ricibi un testimonio di un miembro di RED cu a pone e partido pensa hopi cu ta importante pa tin un oferta electoral diferente pa 2017. El a skirbi un sorto di credo den partido RED, cu ta kere den partido RED Democratico, cu ta un partido di principio, un partido progresista, un partido cu a trece dilanti separacion di poder, cu e poder legislativo mester controla poder ehecutivo. Cu a propone for di principio bon gobernacion y transparencia, a trece dilanti e principio di derechonan humano, derechonan di hende grandi, derechonan di mucha, derechonan di grupo di minoria den nos comunidad. E derecho di e consumidor pa uza remedinan di tera, incluyendo cannabis y cu e ta kere cu den un partido cu a trece dilanti hopi mocion den Parlamento tempo cu tabata representa den Parlamento, mocionnan cu a wordo ehecuta manera ampliacion di hospital, Linear Park, fietspad y asina el a menciona un lista largo cu e ta bisa cu ta pesey ta importante pa RED participa un biaha mas na 2017. Y no laga e oferta electoral na solamente partidonan di esnan cu ora nan a drenta politica, nan no tabata tin nada y awor cu nan a baha como minister, nan ta rico.
Mester di un partido unda cu esnan cu ta drenta ta eynan pa sirbi nos comunidad.
Despues di hopi papiamento y sinta na mesa, partido RED awe ta dicidi cu lo sigui cu e meta cu e partido a ser lanta cune segun Lampe.
E ora a dicidi cu en berdad ta importante pa ofrece algo diferente. E partido aki cu a mustra cu tin principio y cu ta consecuente cu su principionan y pesey tambe a dicidi den e dianan aki cu a wordo acerca pa un grupo di ciudadano pa firma un peticion di e referendum revocatorio. Mas di 7000 ciudadano a firma bisa cu mirando e problemanan interno cu Gabinete Eman tin y cu el a reconoce esey cu ta dificil pa e por sigui goberna na un manera responsabel, e ora ey ta pidi pa bin cu un referendum revocatorio unda cu pueblo por dicidi si ta sigui cu e mandato aki of no. y si no ta sigui cu e mandato aki, mester un zakenkabinet, un gobierno interino. A dicidi e ora ey den e seno di partido RED Democratico, directiva a firma e peticion aki y e ta pas cu su filosifia awor aki pa eleccion 2017 y den pasado tambe ora cu tabata den Parlamento, a propone nan Staatsregeling, constitucion y inclui referendum dentro di nos constitucion, consulta cu pueblo y ta bay den 2017 cu e idea basico aki cu ta importante pa consulta cu pueblo y respeta loke pueblo e mayoria ta bisa, aunke tin biaha e no ta di acuerdo cu bo opinion personal. Esey ta yama e democracia mas directo y a forma parti awor aki di e asociacion di America Latina di partidonan digital, pues e ta pas cu RED Democratico. Esey kiermen cu awor aki ta parti di un organisacion cu a desaroya un sistema cu yama Democracy Open Source cu unda cu via App di bo telefon, si un di e miembronan, haya e confiansa di pueblo pa ta den Parlamento, e ora ey esnan cu ta registra via bo sistema, nan por participa directamente, unda cu nan ta na reunion di Parlamento y nan por dicidi y bisa si nan ta na fabor di tal mocion, nan ta contra of nan ta abstene y cu tur e links y informacionnan pa e ciudadano por dicidi na un manera responsabel y bon informa. Nos ta bibando caba den e era digital. Democracia, sistema politico, mester adapta su mes na e era digital. Ya ta posibel pa tur ciudadano, via un app di telefon, na unda cu e ta, por participa den desicionnan di Parlamento y no por laga decisionnan di Parlamento den man di un paar di hende cu hopi biaha ta responde na interes di esnan cu a financia nan campaña, segun Rudy Lampe.