Riba 26 di september partido ReD a introdusi pa prome biaha e sistema digital di consulta yama DemocracyOS. A scoge e fecha aki, pasobra riba e dia aki a trata den Parlamento e topico di CITGO. Ta un decision cu lo tin hopi consecuencia pa Aruba, sinembargo ta laga 21 hende dicidi sin a consulta cu pueblo. Asina nos democracia a degenera, ta un grupito ta dicidi, y e pueblo mag vota cada cuater aña, y e circo di stempelparlement ta sigui.
Pesey ReD, afilia na partidonan digital di America Latina, a bin cu e sistema aki, unda cualkier Arubiano na unda cu e ta via su Smartphone of computer por a vota dia 26 di September pro of contra of abstene pa loke ta e deal di CITGO na mesun momento cu e reunion tabata tumando lugar den Parlamento. Esnan cu a vota por a dispone di tur informacion cu e parlamentiornan tin, a proporciona e link di por ehempel e conseho di Raad van Advies y otro informacionnan cu a keda publica den exterior riba e topico aki. E idea ta pa ora esun vota riba un topico e ta bon informa. Awendia e era digital ta haci posibel pa e votador por dicidi directamente riba cualke topico cu ta keda trata den parlamento.
Esaki no ta un sistema exclusivo di partido ReD. Nos a haci un test riba 26 di September y a resulta cu e ta funciona. Cualkier otro partido por haci uso di e sistema aki pa pone e decision den man di pueblo. Si ReD tabata tin representacion den Parlamento, e fraccion di ReD lo mester a vota segun e resultado di e votacion di esnan cu a participa den e consulta riba deal di CITGO. Di nos consulta 66% a vota contra, ke men fraccion di ReD lo mester a vota contra e CITGO deal. Argumentonan ta: e deal no ta transparente, ta local families and friends ta den e compania, ta e pagado di impuesto es decir e pueblo lo mester bai subsidia esaki, e ta bai ta negativo pa e medio ambiente manera Isla na Corsou, si Rincon, awor cera na Merca pa labamento di placa y kende tin hopi inversion y amigo politico na Aruba, a orkestra e plan aki kiermen e ta un proyecto corupto.
ReD a demostra asina cu ya ta posibel cu e votador ta dicidi riba e destino di Aruba, y no manera ta aworaki e caso, cu esnan cu a hinca placa den un partido of politico ta call the shot. E proximo consulta cu pueblo di ReD ta tocante e topico di seguridad. Laga bo opinion resona di un manera anonimo. Djis bishita https://app.democracyos.org/vozdipueblo y bo por registra di un manera anonimo y asina bo por vota. Esaki ta e slogan cu ReD a lansa pa eleccion 2017, VozDiPuebloDenParlamento. Hopi no kier bay manifesta dia 29 di September pa no mustra cara y risibi represaya, pero awor bo por protesta di un manera digital y di un forma anonimo via e sistema aki di ReD. Haci uso di dje pa duna bida atrobe na nos democracia, cu a keda secuestra pa e stempelparlement.