Recuperacion tras di horcan ta impulsa benta di auto nobo

0

DETROIT, Michigan – E principal fabricantenan di auto a reporta un aumento mayor na e tan spera benta di autonan nobo na Merca na September, ya cu e consumidornan di e zona afecta pa e reciente horcannan, a reemplasa rapidamente nan autonan daña door di e inundacionnan.
Analista y consultornan di e industria a pronostica cu horcannan Harvey y Irma lo a duna e fabricantenan di auto nan prome aumento mensual den benta na 2017. E despachonan tabata debil tras un solido racha desde 2010 cu a culmina cu bentanan record di 17,55 miyon di unidad na 2016.
E tasa anual destacionalisa di benta di auto y trucknan na Merca den September a subi na 18,57 miyon di unidad, desde e 17,71 miyon di un aña atras, segun cifranan di Autodata Corp.
A pesar cu e bentanan a subi mas leu di e zonanan golpia pa e tormentanan, segun e fabricantenan di auto y concesionario, e gran parti di e ganashinan di September, a tuma luga despues cu Horcan Harvey a asota Texas.
Segun consultornan, e reemplasonan di vehiculo durante e recuperacion di zuidoost di Texas y Florida, lo a impulsa e benta di autonan nobo y uza te cu por lo menos November.
E accionnan di Generla Motors Co a subi mas di un 3 porciento na su maximo nivel desde su oferta publico inicial tras di e kiebro na 2010. E titulonan di Ford Motor Co. a avanza mas di un 2 porciento.
Di acuerdo na calculacionnan di e industria, te cu 500 mil vehiculo a keda daña of distrui tras di e paso di Harvey y otro 200 mil debi na horcan Irma.
E benta di GM a subi casi un 12 porciento respecto di September di 2016, ante un aumento di 43 porciento di e vehiculonan “crossover” y un aumento di 10 porciento di e pickupnan.
E benta di autonan nobo den e area di Houston, e di cuatro mas pobla di Merca, a aumenta un 109 porciento den e tres simannan posterior na horcan Harvey, compara cu e tres simannan prome cu e tormenta, e website di informacion automotriz Edmunds, a precisa.
E benta di Ford Motor Co, en tanto, a escala un 8,7 porciento na September, mientras cu esunnan di Toyota a aumenta casi un 15 porciento. Di su parti, Fiat Chrysler Automobiles (FCA) a reporta un caida di un 10 porciento den su benta y Nissan Motor Co Ltd a informa di un aumento di 9,5 porciento.
Fuente: www.reuters.com