Ami ta cay den e grupo di ciudadanonan cu casi bo no sa cu nan t’ ey.
Nan ta cumpli cu tur regla, nan ta paga nan debenan na tempo, nan no
ta biba riba nan nivel, nan ta traha añanan largo sin bai AO, no ta
papia riba religion ni politica, no ta ontduik belasting y no ta cana
busca problema riba caya. Sin conta cu ora e ciudadanonan aki vota,
nan ta haci esaki segun nan consenshi y sin bai roga niun hende pa
fabor.
E problema cu ciudadanonan asina aki ta cu cierto momento politiconan
ta lubida riba bo paso nan ta take bo presencia como granted. Cada
biaha den parlamento politiconan ta presenta yen di fanfaria, blaas y
strooitjes paso nan a aumenta algo atrobe pa e gruponan menos afortuna
den nos comunidad: a aumenta kindertoeslag, a aumenta salario minimo,
a aumenta pensioen di behez. Y kiko e ciudadano cumplido pero
invisibel ta haya? E ultimo aumento cu mi a haya como ciudadano
ehemplar ta aumento di prima di AZV y aumento di edad di pensioen. Dos
aumento cu no ta yudami cu nada paso dia mi a bira malo pa prome biaha
despues di añanan trahando sin NUNCA bai AO, dokter no por a ni bisami
si ta zika, dengue of chikungunya mi tin y a mandami cas bai drumi te
dia mi bira bon ‘cu poder di Dios’. Di AZV mi no a haya niun remedi,
corda sikiera un blachi papaya pa mi herbe y alivia mi malestar.
Di mi pensioen probablemente nunca mi lo goza paso cu e fluho di
stranheronan drentanto mi pais pa loco, nan lo yega e edad prome cumi
y mirando con tur luna mi tin cu para oranan largo na belastingdienst
ta cunsumi, mi ta kere cu e unico cuido medico cu mi lo haya ta par di
shock di e defibrillator pega na e muraya den belastingdienst unda nan
lo purba rebiba mi pa asina por goza paar di aña mas di mi pagonan
regular y na tempo.
Nada contra gruponan menos afortuna, pero a bira tempo pa duna
incentiva na e gruponan afortuna di tin un trabou y afortuna di por
cumpli cu nan debernan nechi nechi. E grupo cu ta traha un presupuesto
tur luna pa asina por paga nan nummerplaat den un biaha na luna di
januari. E grupo cu ta haci nan best tur dia pa presenta na pia di
trabou y cumpli cabalmente sin dal AO ala ambtenaar. E grupo afortuna
cu ta paga belasting cabalmente pa asina gobierno bai y yuda esnan
menos afortuna den nos comunidad.
Ki incentiva abo como politico tin p’ami pa asina mi sigui cu e gana
di ta un ciudadano ehemplar cu ta paga tur su debenan y no a subi caya
ainda pa atraca hende of horta cos cu otro a traha duro pa nan jega na
dje? Nami un incentiva ora mi paga mi nummerplaat den un biaha. Kisas
un korting chikito? Que hubo un incentiva pa esnan cu nunca ta bira
malo na pia di trabou? Que hubo polis subi caya na drechi y controla
tur auto riba nan papelnan y si nan ta gekeurd ya fin di aña ami como
ciudadano ehemplaar no mester tende cu como 70% di automobilistanan no
a ni paga e prome mitar di nan nummerplaat corda pa tin nan auto
segura?
Cosnan asina ta ponemi haya gana di bira malo y bai drumi na cas pa
asina sikiera mi saca mi placa cu mi ta paga tur luna na AZV. A bira
tempo pa politiconan premia e ciudadanonan cu ta cumpli cabalmente y
ta carga e peso pa tur esnan menos afortuna. Duna incentivo na e grupo
cu ta haci posibel pa abo como politico por drenta parlamento cu
fanfaria, blaas y strooitjes y haci promesanan cu placa di e ciudadano
ehemplar y cumplidor cu bo a lubida riba dje.