Recepcion pa Juan David Yrausquin cu ta despedi como Minister Plenipotenciario

0

Na Sociëteit de Witte a tuma lugar diaranson 25 di october un recepcion ameno pa dispidi di Juan David Yrausquin como Minister Plenipotenciario di Aruba na Hulanda.
Hopi relacionnan di Aruba for di mundo di politica Hulandes, ministerionan, partnernan di Aruba, organisacionnan y studiantenan a haci uzo di e oportunidad pa yama danki na sr. Yrausquin pa e periodo cu el a funciona como representante di Aruba na Hulanda.

Entre e grupo di invitadonan cu a bin pa duna Juan David, hunto cu su esposa Amy Yrausquin-Roos, un man tabata presidente di Eerste Kamer, Ankie Broekers-Knol, vice-presidente di Raad van State Piet Hein Donner, Minister Plenipotenciario di Curaçao Anthony Begina, Minister Plenipotenciario di Sint Maarten Henrietta Doran-York,Shawn Patrick Crowley como representante diplomatico di merca, Minister demisionario di Husticia Arthur Dowers cu ta actualmente na Hulanda y lider di fraccion di CDA den Tweede Kamer Sybrand Buma.
Tabata tin representante di diferente ministerionan y tambe algun partnernan importante di Aruba, manera KLM y TNO.
Mirando cu Minister Juan David Yrausquin tabata hopi envolvi cu studiantenan, algun studiantenan cu ta miembro di e Plaatselijke Opvangcommissie (POC) tambe a presenta na e ocacion aki pa gradici Minister Yrausquin pa su atencion pa cu studiantenan Arubiano.

E recepcion a wordo deleita cu musica di Xavier Geerman y Jaderick Croes,dos hoben musico Arubiano cu a presenta nan propio composicion y musica tipico di Aruba.

Publicacion di e potret ta unicamente posibel cu mencion di e nomber di e fotografo Nico van der Ven.