E wega final di campeonato 2016-2017 ta inicia diamars 27 di Juni 2017 entre SV RCA y Deportivo Nacional. E teamnan lo hunga play-off di “Best out of 3”, unda cu esun cu gana 2 wega lo bira campeon di e campeonato. E wega lo cuminsa diamars pa 8:00PM den stadion Guillermo Prospero Trinidad na Dakota. AVB ta premira cu e weganan lo ta na nivel y cu tur hende lo disfruta di e weganan. Dialuna atardi AVB a desvela e trofeo di campeon hunto cu dirigente di e teamnan SV RCA y Deportivo Nacional.
Presidente di Sport Vereniging Racing Club Aruba (RCA), Ditto Acosta, a indica cu nan ta contento di hunga final un biaha mas y nan no a stop di train. E team tin como meta pa gana e campeonato pa di 3 aña consecutivo. Si nan gana e campeonato di Division Honor, esaki lo ta e di 35 trofeo di campeon pa SV RCA.
A funda SV Racing Club Aruba (RCA) dia 15 di februari 1934. E team a sa di crece den e ultimo 83 añanan te bira un organisacion di riba 300 futbolista. Nan ta parti den division di infantil, hubenil, hoofdklas, damas, 35+, 40+ y 50+. Roland “Ditto” Acosta ta Presidente di e organisacion, mientras cu Omar Tromp ta e coach di e ekipo di 25 futbolista cu ta hunga den e division di Honor. Historia a conta nos cu den pasado, e ekipo di RCA a logra titula campeon na 34 ocasion. E ekipo di RCA ta e prome campeon di pais Aruba na aña 1986 y ta e prome team di Aruba pa bira campeon Antiano na aña 1966. E ultimo biaha cu SV RCA a bay cas cu e trofeo di campeon tabata den e campeonato di aña 2011-2012, e tempo ey contra SV La Fama. SV RCA ta conta cu sosten di su patrocinadonan Big Wheel Lottery, Powerade (Tropical Bottling Company) y Kentucky Fried Chicken.
Director tecnico di Deportivo Nacional Dreyer Bracho a expresa di ta contento cu e team a yega final. E ta contento di por ta coach na Aruba y cu e team a yega final. E ta spera cu nan por bay cu e trofeo. Deportivo Nacional ta cla pa duna tur loke cu nan tin riba tereno pa asina busca pa bay cu e victoria despues di 10 aña.
A funda Deportivo Nacional dia 15 di Maart 1970 y desde e tempo ey a haci historia den e deporte rey di futbol. Nan ta profila den tur liga di futbol, manera ta division mini baby, baby, Lifida A, Lifida B, Mayor, Junioren y Division Honor. Tambe nan ta den e liga veterano 35, 40 y 50. Mas o menos 200 futbolista ta hunga pa Deportivo Nacional den tur division incluyendo e muchanan cu ta hunga den Lifida. Desde fin di aña pasa nan a inaugura nan veld di bala nobo situa na Alto Vista. Deportivo Nacional ta conta cu sosten di su patrocinado Coca Cola.
Marlon Werleman, Vice Presidente di Arubaanse Voetbal Bond (AVB) ta invita henter comunidad di Aruba pa yega stadion y apoya ambos team cu lo competi pe titulo maximo den Division Honor. Porta ta habri pa 7:30 PM, mientras wega lo ta pa 8:00PM. Entrada ta 10 florin pa adulto y 3 florin pa mucha.